Germanııada koronavırýspen kúrestiń jańa sharalary engizilip jatyr
BERLIN. QazAqparat – GFR kantsleri Angela Merkel elde koronavırýs ınfektsııasynyń ósimin toqtatý úshin tıisti sharalardy odan ári qoldaný maqsatynda Germanııanyń barlyq 16 federaldyq jeriniń basshylarymen kezdesti, dep habarlaıdy QazAqparat.
Kezdesý búkil Germanııa boıynsha COVID-19 juqtyrý oqıǵalarynyń ósimine baılanysty ótkizilgen. Sońǵy táýlikte GFR densaýlyq saqtaý organdary koronavırýsqa shaldyǵýdyń 2000-nan astam jańa oqıǵasyn tirkegen.
Kantsler A.Merkel Germanııada aýrý juqtyrýdyń mundaı qarqynymen jyldyń sońyna qaraı kórsetkish kúnine 19 myńnan astam oqıǵaǵa deıin jete alatynyn eskertti.
Onyń aıtýynsha, jańa sharalardyń maqsaty – bıliktiń qaýipti ınfektsııa ósiminiń aldyn alyp, ulttyq oqshaýlaýdy boldyrmaý.
«Biz aımaqtyq deńgeıde, naqty ári maqsatty túrde áreket etkimiz keledi, elimizde taǵy da shekteý engizilgenin qalamaımyz – oǵan jol berilmeýi tıis», - dep málimdedi A.Merkel baspasóz konferentsııasynda.
Ulttyq deńgeıdegi keńes qatysýshylary indetti juqtyrý qaýpi joǵary aýdandarda kóńil kóterý keshterin ótkizýdi shekteýge kelisti. Jeti kún ishinde 100 000 adamǵa shaqqanda aýrý juqtyrýdyń 35 myń oqıǵasy tirkelgen aýdandarda jekemenshik kóńil kóterý keshteriniń sany 25 adamǵa deıin, al qoǵamdyq oryndardaǵy jınalys sany endi 50-ge deıin shektelgen.
Búkil Germanııa boıynsha úılený toılary, kóńil kóterý keshteri men basqa da jeke uıymdastyrylǵan sharalar COVID-19 juqtyrý oqıǵalarynyń ósimine ákeletin oshaqtar bolyp sanalady. Osylaısha, elde halyq eń tyǵyz ornalasqan Soltústik Reın-Vestfalııadaǵy Hamm qalasynda ótken úılený toıynda 100-den astam adam, sonyń ishinde 40 bala indet juqtyrdy.
«Biz kóp nárseni úırenip, jazdyń ishinde KVI-ǵa qarsy kúres júrgizýdi úırendik», - dep atap ótti A.Merkel. Alaıda ol kúz ben qys aldynda aýrý juqtyrý sanynyń ósimi alańdaýshylyq týdyrtyp otyrǵanyn bildirdi.
Olaı bolǵanymen, GFR bıligi ekonomıkanyń qyzmetin, balabaqshalar men mektepterdiń jumysyn toqtatpaýyn el úkimetiniń basty basymdyǵy retinde sanaıdy.
Budan basqa, 16 federaldyq jerdiń barlyǵynda endi ınfektsııanyń taralýyna jol bermeý úshin meıramhanalar men barlarda alkogol ónimderin satýǵa tyıym salynady.
Kantsler A.Merkel men GFR jerleriniń úkimet basshylary azamattardy osy kúzde qaýipti aımaqtarǵa sapar jasamaýǵa shaqyrdy.
Germanııamen kórshiles birneshe el – Belgııa, Nıderlandy jáne Frantsııada da indet juqtyrýdyń ósimi baıqalýda. A.Merkel Germanııa úkimetiniń EO-nyń basqa elderimen zardaptardy jumsartý boıynsha sharalar qoldanatynyn atap ótti.
