Germanııada koronavırýsqa baılanysty shekteý 31 qańtarǵa deıin uzartyldy
BERLIN. QazAqparat –5 qańtarda Germanııa federaldy jerler men Úkimeti ókilderiniń kezdesýinen keıin pandemııaǵa baılanysty shekteýge qatysty sheshim qabyldandy, dep habarlaıdy QazAqparat dw.com-ǵa silteme jasap.
Elde bir apta ishinde 100 myń adamǵa shaqqanda 200-den astam ınfektsııa juqtyrý anyqtalǵan aýdandarda shekteý kúsheıtiletin boldy. Bul týraly Germanııa kantsleri Angela Merkel federaldy jerlerdiń premer-mınıstrlerimen birlesken otyrys sońynda málimdedi.
Onyń aıtýynsha, árbir 100 myń adamǵa shaqqandaǵy aýrýǵa shaldyǵý jaǵdaıynyń sanyn 50-ge deıin azaıtý mindeti tur. Bul koronavırýstyń jańa mýtatsııasynyń taralýy jaǵdaıynda óte mańyzdy.
10 qańtarǵa deıin kúshine engen shekteýler, mysaly, bólshek saýda jelisi men meıramhana úshin úsh apta - 31 qańtarǵa deıin uzartyldy.
Balabaqsha men mektepter 31 qańtarǵa deıin jabyq bolady. Qajet bolǵan jaǵdaıda balalarǵa kútim jasaýda shuǵyl kómek kórsetilýi múmkin, sabaq burynǵydaı qashyqtan ótkiziledi. Sonymen qatar, ata-analar bala kútimi úshin aqyly demalys alýyna bolady.
Turǵyn koronavırýstyń taralý qaýpi joǵary «qaýipti aımaqtardan» kelgen kezde mindetti túrde test tapsyryp, 10 kúndik karantınge jatqyzý engiziledi.
Eske sala ketsek, 2020 jylǵy16 jeltoqsannan bastap Germanııada qatań lokdaýn engizilgen bolatyn, ol bastapqyda kem degende 2021 jyldyń 10 qańtaryna deıin sozylady dep josparlanǵan.
