Germanııada koronavırýs juqtyrý deńgeıi sharyqtaý shegine jetti

Belgııada SARS-CoV-2 juqtyrýdyń táýliktik ósiminiń antırekordy tirkeldi. Juqtyrǵandardyń sany – 7481.

100 myń adamǵa eseptegende koronavırýsqa shaldyqqandar sany sońǵy eki aptada 494 adamdy qurady (el astanasy Brıýsselde - 880). Pandemııa bastalǵaly Belgııada ınfektsııany juqtyrǵan azamattardyń jalpy sany 181,5 myńǵa jetken.

Grýzııanyń batysyndaǵy Tbılısı men Imeretıde 16 qazannan bastap koronavırýspen kúrestiń jańa sharalary kúshine enedi. Atap aıtqanda, eldegi meıramhanalar men oıyn-saýyq mekemeleri saǵat 22.00-den keıin jumysyn toqtatady. Al memlekettik jáne jeke kásiporyndarǵa jumysty qashyqtan júrgizýge keńes berilip jatyr. Keıingi táýlikte Grýzııada koronavırýsty juqtyrýdyń rekordty kórsetkishi tirkelip, indet bir kúnde 919 adamdy sharpyǵan. Jalpy elde koronavırýspen aýyrǵandardyń sany 14,4 myńǵa jetti.

Polshada koronavırýsty juqtyrýdyń táýliktik ósimi 8 myńǵa jetti (sońǵy táýlikte 8099 adam). Jańa jaǵdaılardyń kóbi el astanasy Varshavanyń mańaıyndaǵy aımaqtarda tirkelýde. Jalpy Polshada indetti 149,9 myń adam juqtyrǵan.

Avtrııada bir kúnde 1552 adam tirkeldi. Osylaısha juqtyrǵandardyń jalpy sany 60 224-ti qurady. Qazir vırýstyń jańa túrinen 664 patsıent emdelip jatsa, olardyń 119-y - jansaqtaý bóliminde.

Chehııada da koronavırýsqa shaldyǵýdyń táýliktik ósimi jaǵynan antırekord tirkeldi. Sońǵy 24 saǵattyń ishinde bul elde koronavırýs ınfektsııasy 9544 adamnan anyqtalǵan. Birneshe kún buryn ǵana ósim 8325 jaǵdaıǵa jetken edi. Jalpy Chehııada pandemııa bastalǵaly indet 139 290 adamdy qursaýyna alǵan . Bir táýlikte vırýstyń jańa túrinen 35 adam kóz jumyp, jalpy qaıtys bolǵandardyń sany 1172 boldy.

Ýkraınada 15 qazanda, ıaǵnı beısenbi kúni tańerteń SARS-CoV-2 vırýsyn juqtyrýdyń 5 062 jańa jaǵdaıy tirkeldi. Ol eldegi Ulttyq qaýipsizdik jáne qorǵanys keńesiniń Koronavırýs epıdemııasynyń taralýyna monıtorıng júıesiniń saıtynda buryn juqtyrǵandardyń 73-i qaıtys bolǵany habarlanǵan. Odan bir kún buryn, ıaǵnı 14 qazanda ınfektsııa 5590 adamnan anyqtalǵan edi. Pandemııa bastalǵannan beri ondaǵy juqtyrǵandardyń sany beısenbi kúni tańerteńgi statıstıka boıynsha 281 239 adamdy quraǵan. COVID-19 vırýsynan 5 302 adam qaıtys bolǵan.

Germanııada juqtyrǵandar sanynyń kún saıyn ósip bara jatqany habarlanyp otyr. Robert Koh ınstıtýtynyń málimetteri boıynsha, sońǵy táýliktegi testiler 6638 adamnyń vırýs juqtyrǵanyn kórsetken. Bul - elde epıdemııa bastalǵannan bergi eń joǵary kórsetkish. Buǵan deıin koronavırýstyń jańa túrin juqtyrýdyń eń kóp jańa jaǵdaıy 28 naýryzda (6294) tirkelgen bolatyn. Jalpy Germanııada epıdemııa bastalǵannan beri 341 223 adamnan SARS-CoV-2 ınfektsııasy anyqtalǵan. 9710 patsıent qaıtys bolǵan. Worldometer portalynyń habarlaýynsha, barlyǵy 284 600 adam saýyǵyp ketken.

Portýgalııa jańa tıptegi vırýsty juqtyrǵandar sanynyń artýyna baılanysty tótenshe jaǵdaı rejımin engizip jatyr. Qaýlynyń kúshinde turatyn merzimi 15 kúnge eseptelgen. Lıssabonda ótken Úkimet otyrysynda premer-mınıstr Antonıo Koshta aıtqandaı, qaýly bılikke azamattardyń júrýine jáne qoǵamdyq ómirde shekteý qoıýǵa múmkindik beredi. Kópshilik jınalystarǵa bes adamnan, al jeke keshterde 50-den artyq adam jınalmaýy kerek. Qaýlyny áli de eldegi parlament - Respýblıka keńesi maquldaýy kerek. 14 qazannyń ózinde Portýgalııada vırýs juqtyrǵandardyń sany 2072-ge jetti. Bul - pandemııa bastalǵannan bergi eń joǵary kórsetkish.

AQSh-ta koronavırýsqa shaldyqqandar sany 53 609 adam jetip, olardyń jalpy sany 7,95 mln adamǵa jaqyndady. Jalpy atalmysh elde koronavırýstan kóz jumǵandardyń sany 216 650 adamǵa jetken. Bul – pandemııa bastalǵaly New York Times basylymynyń júrgizip kele jatqan sanaǵy.

AQSh prezıdenti Donald Tramptyń kenje uly - 14 jastaǵy Barron koronavırýs juqtyryp aldy. Bul týraly onyń anasy, AQSh-tyń birinshi hanymy Melanııa habarlady. Onyń aıtýynsha, testten ótkennen keıin ulynan vırýstyń jańa tıpi anyqtalǵan. Alaıda ulynyń boıynda aýrýdyń eshqandaı belgisi baıqalmaǵan. «Baqytymyzǵa oraı, ol myǵym jasóspirim» dep qosty Aq úı basshysynyń áıeli.

Brazılııada ótken táýlikte taǵy 749 adam koronavırýstan qaıtys boldy. Eldiń Densaýlyq saqtaý mınıstrliginiń málimetterinshe, aýrý juqtyrǵan adamdardyń sany sońǵy táýlikte 27235 adamǵa kóbeıip, jalpy juqtyrǵandardyń sany 5 140 863-ke jetken. Brazılııada koronavırýs ınfektsııasynyń saldarynan barlyǵy 151 747 adam qaıtys bolǵan. Worldometer málimeti boıynsha Brazılııa koronavırýstyń ólimi boıynsha álemde AQSh-tan keıin ekinshi, ınfektsııalar sany boıynsha AQSh pen Úndistannan keıingi úshinshi orynda tur.