Germanııada koronavırýs juqtyrǵan adamdar sany qaıta kóbeıdi
LONDON. VVS – QazAqparat – Eýropada koronavırýs pandemııasy baıaýlap, Eýroodaq elderi karantın sharalaryn jumsartýda. Al Germanııada aýrýlar sany taǵy ósýde. Brazılııada koronavırýs juqtyrǵandar sany mıllıonnan asyp, 50 myń naýqas qaıtys boldy, dep habarlaıdy QazAqparat Bı-bı-sı agenttigine silteme jasap.
Ispanııa tótenshe jaǵdaıdy alyp tastap, kóptegen Eýropa elderinen kelgen qonaqtarǵa óz shekarasyn ashty. Ispanııada Covid-19 vırýsynan 28,3 myń adam qaıtys bolǵan.
Brıtanııada shetelden kelgen adam 14 kúndik karantınde bolýy tıis.
Germanııada Robert Koh atyndaǵy ınfektsııalyq aýrýlardy zertteý ınstıtýtynyń málimetinshe, R bazalyq kórsetkishi (bir naýqas adam juqtyrǵan adamdardyń ortasha sany) kúrt ósken: jeksenbide ol 2,88 boldy, senbide 1,79. ıAǵnı, árbir aýrý juqtyrǵan 100 naýqas 288 adamǵa juqtyrady. Koh ınstıtýtynyń málimetteri boıynsha, jańa aýrý qarttar men aýrýhanalarda, bosqyndarǵa arnalǵan mekemelerde, kólik kompanııalary men et óńdeıtin zaýyttarda, sondaı-aq maýsymdyq aýylsharýashylyq jumysshylarynda anyqtalǵan.
Brıtanııada resmı derekter boıynsha 300 000-nan astam koronavırýs juqtyrý oqıǵasy anyqtalǵan, 42500 naýqas kóz jumǵan.
Shotlandııada besinshi kún qatarynan koronavırýs ınfektsııasynan kóz jumǵandar joq, elde 2 472 patsıent qaıtys bolǵan.
Covid-19 vırýsynan qaıtys bolǵandar sany jóninen álemde AQSh-tan keıingi ekinshi orynda turǵan Brazılııada 50 myńnan astam naýqas kóz jumǵan. Djons Hopkıns ýnıversıtetiniń málimetinshe, elde koronavırýs juqtyrý jaǵdaılarynyń sany 1 mıllıonnan asty. Munda ár táýlikte 50 myńnan astam vırýs juqtyrýdyń jańa jaǵdaıy tirkeledi.
Reseıde sońǵy táýlikte koronavırýstyń rastalǵan 7 728 jaǵdaıy tirkeldi. Reseı Federatsııasynda Covid-19 rastalǵan jaǵdaılardyń jalpy sany - 584 680.
Iranda úshinshi kún qatarynan Covid-19 vırýsynan 100-den astam naýqas kóz jumǵan. Ótken táýlikte koronavırýs juqtyrýdyń 2 368 jańa jaǵdaıy tirkeldi. Elde Covid-19 juqtyrý jaǵdaılarynyń sany 205 myń.
