«Halyq alǵysy» medali Qazaqstanda qalaı tabystalady: memlekettik marapat pen halyq qurmetiniń belgisi
ASTANA. KAZINFORM – COVID-19 pandemııasy kezinde Qazaqstanda shynaıy qoǵamdyq mánge ıe bolǵan eń tanymal marapattardyń biri – «Halyq alǵysy» medali paıda boldy. 2020 jylǵy 8 maýsymda Qazaqstan Prezıdenti Qasym-Jomart Toqaevtyń №348 Jarlyǵymen bul marapat qoǵam damýyna jáne indetpen kúreske úles qosqan azamattardy atap ótý maqsatynda bekitildi.
Erejege sáıkes, medal densaýlyq saqtaý, bilim berý jáne áleýmettik salada jemisti eńbek etken, sondaı-aq pandemııa kezeńinde erekshe belsendilik tanytqan qazaqstandyqtarǵa tabystalady.
Marapattaý rásimi saltanatty ári resmı túrde ótedi. Usynystar Parlamentten, Úkimetten, ákimdikterden, mınıstrlikter men qoǵamdyq birlestikterden túsedi. Alaıda sońǵy sheshimdi Memleket basshysy qabyldaıdy. Rásim barysynda Prezıdent Jarlyǵy oqylyp, laýreattarǵa medal men kýálik tabystalady. Ony Prezıdenttiń ózi nemese ýákiletti ókilderi tapsyra alady.
Osy ýaqytqa deıin qazaqstandyq «Halyq alǵysy» medalimen marapattaldy. Olardyń qatarynda eriktiler, dárigerler, muǵalimder, jýrnalıster, ǵalymdar men kúshtik qurylym qyzmetkerleri bar. MIA «Kazinform» dereginshe, tek 2021 jyly Táýelsizdiktiń 30 jyldyǵyna oraı 52 adam osy marapatqa ıe bolǵan.
Qurmetti memlekettik nagrada buqaralyq aqparat quraldary ókilderine de tabystaldy. Olar pandemııa kezeńinde halyqty senimdi ári jedel aqparatpen qamtamasyz etti.
Olardyń qatarynda:
– ulttyq arnalar arqyly áleýmettik mańyzy bar jáne jedel aqparatty halyqqa jetkizgeni úshin marapattalǵan Qydyrjan Darynuly Muhataev;
– ashyqtyq pen mańyzdy jýrnalıstıkany damytýǵa qosqan úlesi joǵary baǵalanǵan Gúljan Ramankýlova;
– memlekettik organdardyń, dárigerler men eriktilerdiń jumysyn turaqty jarııalap otyrǵan óńirlik jáne respýblıkalyq BAQ ókilderi bar.
Ashyq derekkózderge sáıkes, daǵdarysqa qarsy sharalardy aqparattyq súıemeldeýmen aınalysqan júzdegen jýrnalıst, redaktor, operator jáne teleradıo keshenderiniń qyzmetkerleri de marapatqa ıe bolǵan.
Medal ǵylym salasynda da erekshe oryn alady. 2020 jyly Bıologııalyq qaýipsizdik problemalary ınstıtýtynyń ǵalymdary koronavırýspen kúreske jáne otandyq ǵylymdy damytýǵa qosqan úlesi úshin osy nagradamen marapattalǵan.
Medaldiń ózindik sıpattamasy men resmı mártebesi bar. Onyń aldyńǵy betinde «HALYQ ALǴYSY» jazýy, «Birgemiz» logotıpi jáne ulttyq oıý-órnek beınelengen. Búginde bul jaı ǵana memlekettik marapat emes, azamattyq jaýapkershiligi men kásibıligi arqyly el alǵysyna ıe bolǵan jandarǵa kórsetilgen qurmettiń sımvolyna aınaldy.
Qazbek AMANTAIULY
