Germanııada adamdardy taǵy kólik qaqty, jaraqat alǵandar bar
ASTANA. KAZINFORM — Nemistiń Shtýtgart qalasynda kólik bir top adamdy qaǵyp ketken, dep habarlaıdy Anadoly.
Germanııanyń Shtýtgart qalasynda kólik bir top adamǵa soqtyǵysyp, segiz adam jaraqat aldy, onyń úsheýiniń jaǵdaıy aýyr.
Polıtsııa departamenti kóliktiń adamdardy basýy saldarynan zardap shekkender bar ekenin habarlady.
Bul rette polıtsııa bul oqıǵanyń shabýyl nemese ádeıi jasalǵan áreket ekenine eshqandaı dálel joq ekenin atap ótti. Olardyń sózinshe, oqıǵa jol-kólik apaty retinde qarastyrylyp jatyr
Órt sóndirý qyzmeti segiz adamnyń jaraqat alǵanyn, onyń úsheýiniń jaǵdaıy aýyr ekenin habarlady. Zardap shekkenderge medıtsınalyq kómek tolyq kólemde kórsetilgen. Al kólikpen adamdardy qaǵyp ketken 42 jastaǵy júrgizýshi ustaldy.
Eske salsaq, sońǵy ýaqytta Germanııada osyǵan uqsas birneshe shabýyl boldy. 2024 jyldyń jeltoqsanynda Magdebýrgte Saýd Arabııasynyń týmasy, 50 jastaǵy psıhıatr Rojdestvolyq bazar qonaqtaryn kólikpen basyp ótip, saldarynan alty adam qaıtys boldy. Aqpan aıynyń ortasynda 24 jastaǵy aýǵan bosqyny óz kóligimen Mıýnhendegi demonstranttar tobyn qaǵyp ketti. Oqıǵa ornynda jas áıel men bala til tartpaı ketti. Al naýryz aıynyń basynda Germanııanyń Mangeım qalasynda bir top adamdy kólik basyp ketti. Qaıǵyly oqıǵa saldarynan kem degende bir adam qaıtys boldy. Taǵy 25-i jaraqat aldy, olardyń 15-iniń jaǵdaıy aýyr ekeni aıtyldy.