Germanııada kóleńkeli ekonomıkanyń kólemi 500 mlrd eýrodan asty

ASTANA.KAZINFORM – Germanııadaǵy kóleńkeli ekonomıkanyń kólemi qazirgi ýaqytta 500 mıllıard eýrodan asady. Munyń basty sebepteriniń biri eldegi qolaısyz ekonomıkalyq jaǵdaı. 

AZERTADJ agenttigi Tagesschau jańalyqtar portalyna silteme jasap habarlaǵandaı, qazirgi kúrdeli ekonomıkalyq jaǵdaıda Germanııada tirkelmegen nemese tipti zańsyz qyzmet túrleriniń sany artyp keledi.

Zertteý nátıjesine sáıkes, ótken jyly kóleńkeli ekonomıkanyń resmı jalpy ishki ónimdegi (JІÓ) úlesi 11,6 paıyzǵa deıin ósken. Bul sońǵy on jyldan astam ýaqyttaǵy eń joǵary kórsetkish bolyp otyr.

Lınts ýnıversıtetiniń qarjy ekonomısi Frıdrıh Shnaıder men Tıýbıngendegi Qoldanbaly ekonomıkalyq zertteýler ınstıtýtynyń baǵalaýynsha, kóleńkeli ekonomıkanyń jalpy kólemi 510 mıllıard eýro. Bıyl bul kórsetkish 5,5 paıyzǵa artyp, 538 mıllıard eýroǵa jetedi dep kútilýde.

Zertteýshilerdiń pikirinshe, negizgi sebep Germanııa ekonomıkasynyń baıaý ósýi men jumyssyzdyqtyń artýy.

Bul resmı jumyspen qamtylýdy tıimsiz etip, tirkelmegen nemese zańsyz eńbekke yntalandyrady. Sonyń saldarynan 2026 jylǵa qaraı kóleńkeli ekonomıka naqty mánde 9,5 mıllıard eýroǵa ulǵaıady.

Germanııadaǵy kóleńkeli ekonomıkanyń ósimi 20 iri damyǵan ónerkásiptik elderdegi ortasha kórsetkishten úsh ese joǵary.

Zertteý avtorlarynyń boljamynsha, 2026 jyly kóleńkeli ekonomıkanyń eń joǵary deńgeıi Grekııada bolady — JІÓ-niń 21,6 paıyzy. Al eń tómen kórsetkish Shveıtsarııada tirkeledi — 5,3 paıyz. 

Aıta ketelik Germanııada áleýmettik jarnalar 2035 jylǵa qaraı jalaqynyń jartysyna jetýi múmkin.