Germanııada qoqys jáshikterin jappaı tekserý bastalady

ASTANA. KAZINFORM — 15 qyrkúıekten bastap Germanııada bıoqoqys konteınerlerin jappaı tekserý júrgiziledi, dep habarlaıdy BILD.

Qaldyqtardy shyǵaratyn júzden astam kompanııa turǵyndardyń organıkalyq qaldyqtardy durys bólip tastaǵanyn baqylaýǵa kirisetinin habarlady.

Kóktemde kúshine engen jańa ekologııalyq normaǵa sáıkes, endi bıoqoqystyń quramynda bógde qospalar 3 %-dan, al plastık 1 %-dan aspaýy tıis.

Tekserýdi qoqys konteınerlerin áketetin qyzmetkerlerdiń ózderi júrgizedi. Keıbir aımaqtarda qoqys tasýshy kólikter durys suryptalmaǵan qoqysty anyqtaıtyn datchıktermen jabdyqtalǵan.

Erejeni buzǵandarǵa sanktsııalar qarastyrylǵan: bir jerde qoqys jáshigi múlde áketilmeı, qaıta suryptaǵanǵa deıin qaldyrylady, al keıbir jerde arnaıy áketý úshin aqy salynady — mysaly, Baden-Vıýrtemberg jerinde bul standartty konteıner úshin shamamen 84 eýro turady. Jekelegen qalalarda qaıtalanǵan jaǵdaıda ákimshilik quqyq buzýshylyq isi de qozǵalý múmkin.

Osylaısha, el bıligi kompost quramyndaǵy plastık pen basqa da qaldyqtardyń mólsherin azaıtýdy kózdep otyr.

Turǵyndarǵa bul konteınerge, mysaly, kókónis pen jemis qabyqtary, taǵam qaldyqtary, shaı qaltashalary, kofe qoıyrtpaǵy, jumyrtqa qabyǵy salynatyny, alaıda ıt pen mysyqtyń nájisin tastaýǵa bolmaıtyny eskertilýde — sebebi olarda komposttaý joıa almaıtyn parazıtter bolýy múmkin.

Buǵan deıin Úndistannyń Ambıkapýr qalasynda Garbage Cafe atty kafe jelisi 1 kg plastıkalyq qoqysqa túski as usynatyny habarlanǵan edi.