Germanııada qoqys pen vandalızmge qarsy jańa qyzmet quryldy

ASTANA. KAZINFORM — Nemistiń Haılbronn qalasynda polıtsııanyń jańa bólimshesi qoqysty zańsyz tastaý men vandalızmge qarsy kúresetin qyzmet iske qosyldy, dep habarlaıdy BILD. 

Basylym atap ótkendeı, «qoqys polıtsııasy» (Waste Watcher) dep atalatyn arnaıy bólimshe qyzmetkerleri túngi ýaqytta da formada jáne arnaıy formasyz kóshelerdi patrýldeýge shyǵady.

Jańa qyzmet mamandaryna tergeý júrgizý, qoqys qaldyqtaryn qaldyryp ketken kináli adamdardy anyqtaý jáne quqyq buzǵan adamdardy oqıǵa ornynda ustaý quqyǵy berilgen. Agressıvti minez tanytqan jaǵdaıda kózden jas shyǵaratyn gaz ballondaryn qoldaný qarastyrylǵan.

— Bizdiń qyzmetkerler qalanyń kelbetine nuqsan keltiretin máselelerge nazar aýdarady. Bul ruqsatsyz tógilgen qoqys pen graffıtı. Jobanyń basty maqsaty turǵyndar arasynda tazalyqqa sanaly kózqaras qalyptastyrý, — dep túsindirdi Haılbronn merııasynyń ókili.

Qala turǵyndary da tártip ornatýǵa belsendi qatysa alady: quqyq buzǵan adamdar týraly shaǵymdardy arnaıy Mängelmelder onlaın-platformasy arqyly joldaýǵa múmkindik bar. Baǵdarlama ázirge eki jylǵa eseptelgen, alaıda eger joba sátti júzege assa, Germanııanyń ózge qalalarynda da osyndaı bólimsheler qurylýy múmkin.

Buǵan deıin Germanııada bıologııalyq qoqys konteınerlerin jappaı tekserý bastalatyny habarlanǵan. Eldegi júzden astam qaldyq shyǵarý kompanııasy turǵyndardyń organıkalyq qaldyqtardy durys suryptaýyn qadaǵalaıtynyn málimdegen. 

Aıta ketelik Alataý qalasynda alapat órt bolǵan qoqys polıgony jabylǵan edi.