Germanııada qoǵamdyq kólikterde maska taǵý rejımi alynyp tastaldy

ASTANA. QazAqparat – Germanııada 2 aqpan beısenbiden bastap búkil el aýmaǵynda qalalyq qoǵamdyq kólik pen poıyzdarda maska taǵyp júrý kerek degen talap alynyp tastalady. Úsh jylǵa sozylǵan koronavırýs pandemııasynan keıin alys qashyqtyqqa qatynaıtyn poıyzdarda maska taǵý mindetti bolǵan. Sondaı-aq 9 federaldy jerde óńirlik qoǵamdyq kólikte maskamen júrý talaby joıyldy, dep habarlaıdy «QazAqparat» Deutsche Welle silteme jasap.

Kólik kásiporyndary sońǵy kezderi bul talap qazirgi jaǵdaıda ózekti emes ekenin aıtyp, ony alyp tastaýdy surap júrgen. Olar ushaqta nemese kontsert zalynda maskasyz otyrýǵa bolady da, al sonda bara jatqanda avtobýsta ne tramvaıda nege maska taǵýǵa mindetti ekenin jolaýshylarǵa túsindirý qıynǵa soǵatynyn alǵa tartady.

Deutsche Bahn temirjol kontserni de GFR úkimetinen alys jolǵa baratyn poıyzdarda maska taǵý rejımin alyp tastaýdy suraǵan. Nátıjesinde úkimet maska taǵý rejımin 2 aqpannan alyp tastaý týraly qaýly shyǵardy.

Buǵan deıin ony sáýirde alyp tastaıdy dep josparlanǵan edi. GFR densaýlyq saqtaý mınıstri Karl Laýterbah (Karl Lauterbach) óz erkimen maska taǵa berýdi usyndy.

Maska taǵý rejımi 2020 jyldyń basynda pandemııa kezinde birtindep engizilgen bolatyn. Turǵyndardyń bir bóligi maskasyz adamdardyń qasynda otyrǵysy kelmeıtinder úshin poıyzdarda arnaıy oryn belgileýdi talap etýde. Alaıda Deutsche Bahn ókili bundaı bolmaıtynyn aıtty.

Aýrýhana, múgedekter men qarttar úıine, dárigerler praktıkasy mekemelerine baratyndar úshin maska taǵý 7 sáýirge deıin áli de mindetti bolady.

Sonymen qatar klınıkalar men qarttar úıine kirý úshin koronavırýsqa test tapsyryp, teris nátıjesin kórsetý kerek.

Foto: dpa