Germanııadaǵy qylmystyq toptar túrik kásipkerlerine qysym kórsetip jatyr
ASTANA. KAZINFORM — Túrkııa Germanııada uıymdasqan qylmystyq toptar tarapynan qaýip-qaterdiń, bopsalaý men shabýyldardyń artqanyn málimdep, eki eldiń quqyq qorǵaý organdary arasyndaǵy yntymaqtastyqty kúsheıtýge shaqyrdy, dep habarlaıdy Kazinform agenttiginiń Ankaradaǵy menshikti tilshisi.
Ankara Germanııadaǵy túrik qylmystyq toptarynyń belsendiligi artyp, túrik tekti kásipkerlerge qysymdy kúsheıtkenine alańdaýshylyq bildirdi.
Túriktiń hurriyetdailynews basylymynyń habarlaýynsha, Berlın men Soltústik Reın-Vestfalııa shtaty sııaqty birneshe aımaqta bopsalaý, qoqan-loqqy jasaý, órteý jáne qarýly shabýyldar tirkeldi.
Túrkııa ishki ister mınıstri Mustafa Chıftchı telefon arqyly sóılesken kezde nemis áriptesi Aleksandr Dobrındtpen jaǵdaıdy talqylady. Túrik tarapy uıymdasqan qylmystyq toptardan tónip turǵan qaýip-qaterdiń artyp kele jatqanyna toqtalyp, «jańa býyn qylmystyq uıymdarmen» kúreste Germanııamen yntymaqtastyqty keńeıtýge jáne nemis polıtsııasyn túrik dıasporasyn qorǵaýǵa belsendi túrde qatysýǵa shaqyrdy.
Eń belsendi toptardyń qatarynda «Daltons», «Caspers», «Sarals» jáne «Bayğaras» atalady. Túrkııanyń táýelsiz ónerkásipshiler men kásipkerler qaýymdastyǵy (MÜSİAD) múshelerine qatysty jaǵdaılardy qosa alǵanda, 60-tan astam bopsalaý deregi tirkelgen.
Sońǵy oqıǵalardyń biri sáýir aıynyń basynda Nıýrnberg qalasynda boldy: bopsalaýshylarǵa aqsha tóleýden bas tartqannan keıin túrik kásipkeriniń kóligi men jyljymaıtyn múlki órtelgen.
Túrkııa bıliginiń málimetinshe, Germanııada 18 qylmystyq toppen baılanysy bar 32 adamǵa izdeý jarııalanǵan. Kúdiktilerdiń jartysy ustalǵanymen, Túrkııa qalǵandaryn qamaýǵa alyp, ekstradıtsııalaýdy talap etti.
Aıta keteıik, Túrkııanyń Ádilet mınıstrligi ashylmaı qalǵan qylmystardy qaıta zerdeleýge baǵyttalǵan reformany qolǵa aldy.
