Germanııada Qazaqstannyń ekonomıka aptalyǵy bastaldy
FRANKFÝRT-NA-MAINE. QazAqparat - Dúısenbi kúni Frankfýrte-na-Maında «Germanııadaǵy Qazaqstan ekonomıka aptalyǵy» bastaldy, ol 16 qarashaǵa deıin jalǵasady, dep habarlaıdy «QazAqparat» HAA menshikti tilshisi Tımýr Dúısekeev.
Osy shara aıasynda Germanııanyń iskerlik astanasyna QR Investıtsııalar jáne damý vıtse-mınıstri Tımýr Toqtabaevtyń basshylyǵymen Qazaqstan delegatsııasy keldi. 13 qarasha kúni qazaqstandyq sheneýnik Possehl & Co. Kompanııalar tobynyń atqarýshy dırektory Ottmar Rınhoff-Gembýs jáne Rınhoff-Gembýs holdınginiń atqarýshy dırektory Raıner Baýmanmen kezdesti.
Osy kezdesýler barysynda Qazaqstanda et ónimderin shyǵarý jobalaryn iske asyrý jáne ınfraqurylymdy damytý máseleleri talqylandy.
Sondaı-aq, qazaqstandyq delegatsııa Germanııa iskerlik tobynyń ókilderimen birge «Qazaqstandyq iskerlik múmkindikteri» dóńgelek ústeline qatysty. Sharany Deutsche Bank qoldaýymen Strategııalyq yntymaqtastyq jónindegi Qazaqstan-Germanııa iskerlik keńesi uıymdastyrdy.
Qazaqstan delegatsııasynyń quramyna QR Investıtsııalar jáne damý mınıstrliginiń ókilderinen basqa, GFR-daǵy QR elshisi Bolat Núsipov, Kazakh Invest qyzmetkerleri, «Atameken» ulttyq kásipkerler palatasy men «Qaztemirtrans» ókilderi boldy.
Nemis tarapynda Bilfinger azamattyq jáne ónerkásiptik qurylysqa mamandanǵan kompanııasy, SAP baǵdarlamalyq jasaqtamasynyń óndirýshisi, BASF hımııalyq kontserni, Evonik kóp salaly holdıngi, joǵary qospaly qurysh óndirýshisi jáne Thyssen-Krupp mashına jasaý ónimderin shyǵaratyn kompanııa boldy.
Dóńgelek ústelde sóz alǵan Tımýr Toqtabaev qatysýshylarǵa bizdiń elmen ekonomıkalyq yntymaqtastyń jan-jaqty múmkindikteri týraly habarlady.
«Bizdiń el Germanııaǵa shıki munaıdyń jetekshi jetkizýshileriniń biri sanalady jáne osylaısha Germanııa men Eýropanyń energetıkalyq qaýipsizdigin qamtamasyz etýde mańyzdy ról atqarady», - dedi ınvestıtsııalar jáne damý vıtse-mınıstri.
Investıtsııalar jáne damý mınıstrliginiń derekteri boıynsha, Germanııa sońǵy 12 jylda ekonomıkamyzǵa 4 mıllıardtan astam dollar ınvestıtsııa quıǵan, al Qazaqstandaǵy barlyq nemis ınvestıtsııalarynyń 90%-dan astamy shıkizattyq emes sektorǵa tıesili.
Sonymen qatar, qazaqstandyq sheneýnik konferentsııaǵa qatysýshylarǵa QR-daǵy nemis kompanııalarynyń jasap jatqan jemisti jumystarynan mysal keltirdi. Olardyń arasynda QR-daǵy 4 tsement zaýyty qaraıtyn «HeidelbergCement», qurylys materıaldaryn shyǵaratyn Knauf, FunkeKunststoffe jáne Henkel, ónerkásiptik gaz shyǵaratyn Linde, sharly tıekti armatýra shyǵaratyn Boehmer, qubyrlar óndiretin Isoplus, sondaı-aq saýda alyptary MetroCash & Carry saýda kompanııasy bar.
«Yntymaqtastyq salasyn keńeıtý úshin biz nemis avtoóndirýshilerine Qazaqstandaǵy vagondardy qurastyrý boıynsha jobalardy usyna alamyz», - dep atap ótti ol.
Óz kezeginde, nemis bıznesi ókilderi Qazaqstandaǵy qazirgi ınvestıtsııalyq ahýaldy joǵary baǵalap, QR delegatsııasyna ındýstrııalandyrý baǵdarlamasy aıasyndaǵy ózderiniń aǵymdaǵy jobalary men jańa josparlary týraly habardar etti.
Kezdesýdi qorytyndylaı kele, Deutsche Bank-diń Ortalyq jáne Shyǵys Eýropa elderi boıynsha basqarýshy dırektory, Strategııalyq yntymaqtastyq jónindegi Qazaqstan-Germanııa iskerlik keńesiniń teń tóraǵasy Pıter Tıls eki el arasyndaǵy ekonomıkalyq qarym-qatynastarda «úlken jáne tolyqtaı ashylmaǵan áleýet» bar ekenin atap ótti.
