Germanııada Qazaqstan azamaty ustaldy — SІM resmı suraý joldady

ASTANA. KAZINFORM — Elimizdiń Syrtqy ister mınıstrligi Germanııada Qazaqstan azamatynyń zańǵa qaıshy áreketi úshin ustaldy degen aqparatqa oraı resmı suraý joldady.

— Qazaqstan Respýblıkasynyń Syrtqy ister mınıstrligi buqaralyq aqparat quraldarynda Germanııa Federatıvtik Respýblıkasynda Qazaqstan azamatynyń zańǵa qaıshy áreket jasady degen kúdikpen ustalǵany týraly taraǵan aqparatqa baılanysty Germanııanyń quzyretti organdaryna resmı suraý joldanǵanyn habarlaıdy. Qazirgi ýaqytta jaýap kútilýde. Másele mınıstrliktiń baqylaýynda, — dedi vedomstvodan.

Buǵan deıin Deutsche Welle basylymy Germanııanyń federaldy prokýratýrasyna silteme jasaı otyryp, Berlınde sheteldik arnaıy qyzmet úshin tyńshylyq jasaý kúdigimen Qazaqstan azamatynyń ustalǵanyn jazǵan edi. Tergeý málimetine sáıkes, kúdikti ótken jyldyń mamyrynan Ýkraınaǵa áskerı kómek, Germanııanyń qorǵanys ónerkásibi týraly aqparattardy, sonymen qatar áskerı nysandar men tehnıkalardyń qozǵalysy beınelengen sýretterdi berip otyrǵan.

Eske salsaq, jaqynda 10 jyldan astam izdeýde júrgen asa iri mólsherde alaıaqtyq jasaǵan kúdikti Germanııadan ekstradıtsııalanǵany belgili boldy. Qazir sottalýshy tergeý ızolıatoryna qamaldy. Aıyptalǵan qylmysty jasaǵany úshin múlki tárkilenip, 10 jylǵa deıin merzimge bas bostandyǵynan aıyrý jazasy qarastyrylǵan.