Germanııada qaraqshylar tapa tal túste-aq bank seıfterin ashyp ketken

ASTANA. KAZINFORM — Germanııanyń soltústigindegi Shtýr qalasynda ornalasqan Volksbank bank bólimshesinde belgisiz bireýler 14 seıfti buzyp ashqan, dep habarlaıdy DW.

Polıtsııanyń habarlaýynsha, qylmyskerlerdiń jeke tulǵalary ázirge anyqtalǵan joq. Sondaı-aq naqty ne urlanǵany da belgisiz. Bankte barlyǵy 728 seıftik jáshik bar, olardyń ishindegi zattar tek klıentterge ǵana málim.

— Biz jáshikterdiń ishinde ne bolǵanyn aıta almaımyz. Klıentterdiń onda ne saqtaǵany bizge beımálim, — dep málimdedi polıtsııa ókili DPA agenttigine.

Bólimshedegi 728 seıftiń 14-i búlingen. Qaraqshylar qalǵan 714 jáshikke tıispegen.

Polıtsııanyń derekterine sáıkes, qylmys jergilikti ýaqyt boıynsha 12:00 men 14:00 aralyǵynda jasalǵan.

Kýágerler túske taman bank mańynda turaqta turǵan kólikke qaraı bet alǵan kók tústi kombınezon kıgen úsh er adamdy kórgenderin aıtqan.

Túski úzilisten keıin bank qyzmetkeri jertóle qabatyna túsip, ótkir ıisti sezip, ózin jaısyz sezingen. Esikterden belgisiz suıyqtyq tabylǵan. Tótenshe qyzmet ókilderiniń aıtýynsha, ol densaýlyqqa qaýip tóndirmeıdi.

Aımaqtyq NDR telearnasynyń habarlaýynsha, banktiń eki qyzmetkerine medıtsınalyq kómek qajet bolǵan.

Bul qaraqshylyq Gelzenkırhende bolǵan iri urlyqtan bir aıdan sál ǵana ýaqyt ótken soń bolyp otyr. Ol jerde qylmyskerler bank qoımasyna burǵylanǵan tesik arqyly kirip, shamamen 30 mıllıon eýro urlap ketken.

Eske sala ketsek, qańtar aıynda Nıderlandydaǵy kúmis mýzeıden 300-den astam eksponat qoldy boldy.