Germanııada gaz tapshylyǵy bolýy múmkin

ASTANA. KAZINFORM – Uzaqqa sozylǵan aıaz ben jylytýǵa suranystyń rekordtyq artýy aıasynda Germanııadaǵy gaz qory tez azaıyp jatyr, dep jazdy BILD.

Resmı derekterge sáıkes, aldaǵy demalys kúnderine qaraı eldegi jerasty gaz qoımalarynyń tolý deńgeıi 34 paıyzdan tómen tústi. Bul – sońǵy tórt jyldaǵy eń tómen kórsetkish.

Salystyrý úshin aıtsaq, 2025 jylǵy qańtardyń sońynda gaz qoımalary 58 paıyzǵa, al bir jyl buryn 76 paıyzǵa tolǵan edi. Germanııanyń gaz jáne sýtek ónerkásibi qaýymdastyǵy alańdaýshylyq bildirip, bolashaqta eldi gazben qamtamasyz etý máselesinde qıyndyqtar týyndaýy múmkin ekenin eskertti.

– Gaz qoımalary áli de sýyq aýa raıynda senimdi jetkizilimdi qamtamasyz etetin saqtandyrý polısi bolyp qala beredi. Sondyqtan aldaǵy qysqa daıyndyq barysynda olardy tolyqtyrý – basty mindet. Al bos gaz qoımalary qamtýsyz saqtandyrý polısimen teń, – dedi qaýymdastyq basshysy Tım Keler.

Sarapshylar da bul alańdaýshylyqty bólisip otyr. Bohým qalasyndaǵy Rýr ýnıversıtetiniń ekonomısi Andreas Lesheldyń aıtýynsha, eger suıytylǵan tabıǵı gaz termınaldarynyń júktemesi shamamen 60 paıyz deńgeıinde qalyp, sýyq aýa raıy saqtalsa, gaz qorynyń kólemi qaýipti 10 paıyzǵa deıin tómendeýi múmkin.

Al Germanııa úkimeti bul qysta gazben qamtamasyz etý kepildendirilgen dep sendirip otyr.

Degenmen Germanııanyń Federaldyq jeliler agenttiginiń basshysy Klaýs Mıýller kelesi qysqa aldyn ala daıyndalý qajet ekenin atap ótti. Onyń aıtýynsha, el qazirgi jylytý maýsymyn gaz qorynyń óte tómen deńgeıimen aıaqtaıdy.

Aıta keteıik, Ázerbaıjan gazy Avstrııa men Germanııa naryǵyna shyǵa bastady.