Germanııada Eýropa qazaqtarynyń kishi Quryltaıy ótti
ASTANA. QazAqparat - 14-15 mamyrda QR-nyń GFR-daǵy Elshiliginiń jáne Eýropa qazaqtary Eýropalyq qoǵamdastyǵynyń qoldaýymen Keln qalasynda Germanııa, Ulybrıtanııa, Frantsııa, Vengrııa, Avstrııa, Shveıtsarııa, Shvetsııa, Danııa, Norvegııa, Nıderland, Túrkııa, AQSh elderindegi etnıkalyq dıasporanyń eki myńǵa jýyq ókilderiniń basyn qosqan Eýropa qazaqtarynyń kezekti kishi Quryltaıy ótti.
Qazaqstannyń Germanııadaǵy Elshisi Bolat Núsipov Qazaqstan Respýblıkasy Prezıdenti Nursýltan Nazarbaevtyń quttyqtaýyn oqydy. Elbasy qazaq dıasporasyn kele jatqan Qazaqstannyń Táýelsizdiginiń 25 jyldyq mereıtoıymen quttyqtap, «Máńgilik el» Ulttyq ıdeıasynyń kaǵıdalaryna sáıkes, ana tilin saqtaý jáne damytý, mádenıet jáne ulttyq salt-dástúrdi, tarıhı Otanymen baılanysyn nyǵaıtý sııaqty máselelerdiń mańyzdylyǵyn atap ótti, dep habarlaıdy QR SІM baspasóz qyzmeti.
Qazaqstandyq dıplomat memleket tarapynan qazaq dıasporasyn qoldaý boıynsha úlken jumys júrgizilgenin habarlady. Mysaly, 2014 jyly Berlınde ashylǵan Qazaq mádenı-ekonomıkalyq ortalyǵynda qazaq ádebıetiniń klassıkteri, qazirgi zamanǵy qazaq avtorlardyń ádebıetteri, qazaqstandyq jýrnaldar men gazetter, oqýlyqtar, sózdikter, memlekettik tildi oqytýǵa arnalǵan oqý-ádisteme quraldary, sonymen qatar baspasóz jáne elimiz týraly tanymal elektrondyq ónimder usynylady. Osy barlyq materıaldar qazaq dıasporanyń ókilderi úshin qoljetimdi. 2010 jyly Berlındegi Gýmbold ýnıversıteti janynda ashylǵan «Qazaqstan jáne qazaq tili» qyzmet etip jatqan Lektorat qazaq dıasporasynyń jastaryna ana tilin úırenýge, Qazaqstannyń tarıhyn jáne qazirgi zamanǵy damýymen tanysýǵa múmkindik beredi.
Nemis tarapynan Býndestag depýtaty, otandasymyz Genrıh Tsertık sóz sóıledi. Ol Germanııada turyp jatqan 800 myń etnıkalyq nemistiń tarıhı otanymen baılanystaryn qoldaý asa mańyzdy ekendigin atap ótti. Sondaı-aq ol osy elde turatyn etnıkalyq qazaqtardyń ózindik erekshelikterine de nazar aýdardy. G. Tsertık qazaqtardyń óz otbasylaryna qabyldap jáne ajaldan arashalap alyp qalǵandyǵyn nemis halqynyń eshqashan umytpaıtyndyǵyn atap ótti.
Eýropa qazaqtary qoǵamdastyǵynyń basshysy Abdýl Kaıým Kesıchı óz sózinde eýropalyq otandastardyń basqosýlaryn ótkizý sońǵy on jylda jaqsy dástúrge aınalyp otyrǵanyn atap ótti. Onyń basty maqsaty - óz eliniń ulttyq murasy men mádenıetin jastardyń esterine salý. Mundaı kezdesýlerdiń óz tarıhı Otanynan alys turatyn qazaqtar úshin úlken mańyzy bar. Eń bastysy - osyndaı Quryltaılardyń otandastar úshin asa ózekti máselelerdi taldaýǵa, olardy sheshýge múmkindik beretin orynǵa aınalǵandyǵy. A. Kesıchı Eýropada turatyn qazaqstandyqtardyń atynan otandastaryna jeke qoldaýy jáne qamqorlyǵy úshin Elbasyna alǵys bildirdi.
Quryltaı sheńberinde jastar arasynda túrli baıqaýlar, sporttyq saıystar ótkizildi, sýretter kórmesi ashyldy, sonymen qatar balalar merekesi uıymdastyryldy.
Tanymal qazaq ánshileriniń oryndaýyndaǵy dástúrli jáne zamanaýı mýzyka mádenıetiniń birtýma shyǵarmalary atalǵan sharaǵa erekshe ulttyq naqysh berdi.
Eýropadaǵy qazaq qaýymdastyǵy 7 myń adamdy quraıdy. Negizinde bul etnıkalyq qazaqtar, olardyń arǵy atalary kóp jyldar buryn túrli elderden Germanııaǵa kóship keldi.
