Germanııada et kombınatynyń 1300-den astam qyzmetkeri koronavırýs juqtyrǵan

DıÝSSELЬDORF. QazAqparat – Jeksenbi kúngi málimetter boıynsha Germanııanyń soltústik batysyndaǵy et óńdeý zaýytynyń 1331 qyzmetkeriniń koronavırýsqa testi oń nátıje kórsetken. Bul týraly QazAqparat Deutsche Welle agenttigine silteme jasap habarlaıdy.

Bul jaǵdaıǵa qaramastan Soltústik Reın-Vestfalııanyń memlekettik premeri Armın Lashet atalǵan aýdanda karantınniń jańa rejımin engizý áli de qajet emes dep málimdedi.

«Pandemııanyń úlken qaýpi» bar. Alaıda, Bılefeldke jaqyn ornalasqan Reda-Vıdenbrıýktegi Tönnies mal soıý pýnktinde qazirgi kezde ınfektsııa toqtaǵan»,– dep málimdedi Lashet jeksenbi kúni baspasóz máslıhatynda.

Sondaı-aq, ol ınfektsııa halyqqa taralmaýy úshin qoldan kelgenniń barlyǵyn jasaı otyryp, basqa da maqsatty sharalardy qoldanatynyn atap ótti.

Jergilikti densaýlyq saqtaý organdarynyń málimetinshe, jeksenbi kúngi jaǵdaı boıynsha zaýyttyń 1331 qyzmetkeriniń testi oń nátıje kórsetken. Aýrý anyqtalǵandardyń kópshiligi – Rýmynııa men Bolgarııadan kelgen qyzmetkerler. 6500-ge jýyq jumysker men olardyń otbasy músheleri karantınge alyndy.

Germanııada koronavırýs juqtyrǵan jańa jaǵdaılardyń ósim deńgeıi senbi kúni 1,79-ǵa jetti.