Germanııada erler komandasyn jattyqtyratyn áıel bapker synǵa ushyrady
ASTANA. KAZINFORM — Erler komandasyn basqarǵan áıel bapkerge qatysty orynsyz pikirler kóbeıdi. Nemis fýtbol odaǵy arasha tústi, dep habarlaıdy DW.
— Mundaı pikirlerge jol berýge bolmaıdy. Olar tek bir adamǵa qarsy baǵyttalmaǵan, sonymen qatar bizdiń sporttaǵy negizgi qundylyqtarǵa — qurmetke, ádildikke jáne teńdikke kúmán keltiredi, — dedi Germanııa fýtbol odaǵynyń (DFB) vıtse-prezıdenti Selııa Sasıch t-online portalyna.
34 jastaǵy Marı-Lýız Eta Germanııanyń joǵary fýtbol dıvızıony — Býndeslıgada erler komandasynyń bas bapkeri atanǵan alǵashqy áıel boldy. Ol «Ýnıon» klýbyn basqaryp otyr.
Sodan beri Eta úlken qoldaýǵa ıe bolǵanymen, sonymen qatar kóptegen jekkórinishti, kóbine genderlik pikirlerge de tap bolǵan.
Marı-Lýıze Etanyń Instagram paraqshasyna 36 myńnan astam adam jazylǵan. Onyń jazbalarynyń astynda «Asúıge bar!», «Kir jýatyn adam da kerek qoı», «Fýtbol — tek erlerdiń isi» sııaqty pikirler jıi kezdesedi.
Bapkerdiń ózi mundaı pikirlerge alańdamaıtynyn aıtty.
— Ondaı sózder meni emes, olardy aıtqan adamdardy kóbirek tanytady, — dedi Eta.
Eske salsaq, osyǵan deıin germanııalyq «ıÝnıon» fýtbol klýbyn alǵash ret áıel adam jattyqtyratynyn jazǵan bolatynbyz.
