Germanııada er adam bir mekemeniń alty qyzmetkerin atyp óltirdi
ASTANA. KAZINFORM – Germanııanyń soltústigindegi Shtade qalasyndaǵy balalar men jastarǵa arnalǵan mekemede 45 jastaǵy Germanııa azamaty, túrik tekti er adam oq jaýdyryp, alty qyzmetkerdi óltirdi, dep habarlaıdy DW.
Polıtsııanyń málimetinshe, qylmystyń boljamdy sebebi – kúdiktiniń úsh aılyq qyzyna qatysty qamqorshylyq quqyǵyna baılanysty týyndaǵan daý. Kúdikti ustaldy.
Qaza tapqandardyń arasynda tórt áıel men eki er adam bar. Olardyń barlyǵy atalǵan mekemeniń nemese kámeletke tolmaǵandar isi jónindegi jergilikti basqarmanyń qyzmetkerleri bolǵan.
Tómengi Saksonııa jeriniń ishki ister mınıstri Danıela Berens bolǵan oqıǵany «saıası nemese ekonomıkalyq sebepteri joq, sýyqqandy zorlyq-zombylyq áreketi» dep atady.
Lıýnebýrg polıtsııasynyń basshysy Katrın Shýoldiń aıtýynsha, oqıǵa bolǵan kúni kúdikti qyzyna qamqorshylyq jasaý máselesine arnalǵan keńeske shaqyrylǵan. Úsh aılyq sábı men onyń 34 jastaǵy anasy ýaqytsha osy mekemede turǵan. Shabýyl saldarynan olar zardap shekken joq.
– Kúdiktiniń búgin qaza tapqandardyń kópshiligimen qyzynyń bolashaqtaǵy qamqorshylyǵyna qatysty kezdesý ótkizýi josparlanǵan edi, – dep keltiredi AFP agenttigi Katrın Shýoldiń sózin.
Oq atqannan keıin kúdikti 65 jastaǵy áıel basqarǵan avtokólikpen qashýǵa áreket jasaǵan. Áıel onyń týysy nemese tanysy bolýy múmkin. Qýǵynnan keıin ekeýi de ustaldy. Tergeý aıasynda taǵy bir adam qamaýǵa alynǵan.
Katrın Shýoldiń aıtýynsha, quqyq qorǵaý organdary kúdiktiden qaýip týýy múmkin ekenin burynnan bilgen. Alaıda ol polıtsııanyń derekqorynda «asa zorlyq-zombylyqqa beıim adam» retinde tirkelmegen. Sondaı-aq onyń qarý ustaýǵa resmı ruqsaty bolmaǵan.
Kúdiktini resmı túrde qamaýǵa alý máselesi búgin qaralady.
Aıta keteıik, jýyrda Fılıppınde mekteptegi atystan úsh oqýshy qaza tapty.
