Germanııada er adam AITV-dan tolyq emdelip shyqty
Nature jýrnalynda jarııalanǵan maqalaǵa sáıkes, 2008 jyly AITV dıagnozy qoıylyp, «Dıýsseldorf patsıenti» dep atalyp ketken er adamǵa 2013 jyly qandaǵy qaterli isik - ótkir mıeloıdty leıkozdy emdeý úshin transplantatsııa jasaldy.
«Dıýsseldorf ýnıversıtetiniń aýrýhanasy tórt jyldyq júıeli baqylaýdan keıin álemde AITV-ny emdeýdiń alǵashqy dálelin keltire alady», - delingen zertteýshilerdiń dúısenbide jarııalanǵan málimdemesinde.
AITV-dan emdeýdi bastaǵannan keıin alty aı ótken soń «Dıýsseldorf patsıentine» jedel mıeloıdty leıkoz (JML) dıagnozy qoıyldy. Biraq kóńil kónshitpeıtin boljamǵa qaramastan, dárigerler eki aýrýdy bir emdeýmen jeńip shyǵý múmkindigin kórdi.
Ol úshin dárigerler qaýipti aýrý túrlerin diń jasýshalaryn transplantatsııalaý arqyly emdeýge sheshim qabyldaǵan, delingen maqalada.
2006 jyly «Berlındik patsıent» degen atpen belgili Tımotı Reı Braýn osy emnen keıin AITV-dan aıyqqan álemdegi alǵashqy adam boldy. Braýn 2020 jyly 54 jasynda leıkozdyń qaıtalanýynan keıin qaıtys boldy, biraq AITV-dan emdeý onyń ómiriniń sońyna deıin tıimdi boldy.
Adam Kastıleho esimdi «londondyq patsıent» 2017 jyly terapııany toqtatyp, AITV-dan aıyqqan ekinshi adam boldy.
Transplantatsııadan keıin alty jyl ótken soń «Dıýsseldorf patsıenti» AITV-ǵa qarsy preparattardy qabyldaýdy toqtatty. Sodan keıin zertteýshiler patsıenttiń qanynda belsendi vırýs belgileri qalmaǵanyna kóz jetkizý úshin aýqymdy synaqtar júrgizdi.
Bul zertteýler AITV emdeý ádisterin damytýda jaqsy jetistikterdi kórsetkenimen, bul emdeý strategııasy halyqtyń kópshiligi úshin qolaıly emes. Bul - emdelmeıtin jáne ómirge qaýip tóndiretin jaǵdaılar úshin ǵana qarastyrylatyn óte ınvazıvti, joǵary táýekeldi protsedýra, dep atap ótilgen zertteýde. Sondaı-aq, kóp jaǵdaıda oǵan donor tabý qıyn.
Qazirgi ýaqytta ǵylymnyń maqsaty - alynǵan bilimge negizdelgen táýekeli az protsedýralardy ázirleý, AITV-ǵa qarsy dárini adamdar úshin qoljetimdi etý, dep qosyp ótti maqala avtorlary.
Foto: Debarchan Chatterjee/NurPhoto