Germanııada eń qymbat avtoban ashyldy: bir metr jol 225 myń eýroǵa tústi

ASTANA. KAZINFORM — Berlınde Germanııa tarıhyndaǵy eń qymbat avtoban ýchaskesi — A100 jolynyń jańa bóligi ashyldy. Bul joldyń bir metri bıýdjetke 225 myń eýroǵa túsken, dep habarlaıdy DW. 

Joldyń uzyndyǵy — 3,2 shaqyrym, al qurylys jumystary 12 jylǵa sozylǵan. Alty jolaqty magıstral jerden 7 metr tereńdikte salynǵan. Jobalaý kezinde tipti jarqanattardyń tirshiligine keletin qaýip te eskerilgen.

Jańa avtoban ýchaskesi Berlınge jaqyn mańdaǵy qalalardan jumysqa qatynaıtyn adamdardyń jolyn jeńildetip, qaladaǵy keıbir turǵyn aýdandardyń júktemesin azaıtady dep kútiledi.

Alaıda joba synǵa da ushyrap otyr. Synshylar bul jol kerisinshe, kólikter sanyn arttyryp, qaladaǵy ekologııalyq jaǵdaıdy nasharlatýy múmkin deıdi. Sonymen qatar, Berlınde bar joldar men kópirlerdi jóndeýge, temirjol ınfraqurylymyn jaqsartýǵa qarjy jetispeı jatqanda, mundaı qymbat avtoban salý qısynsyz dep esepteıdi.

Qarsy tarap Berlınniń kólik saıasatynda artta qalyp otyrǵanyn aıtady: mysaly, Kopengagen, Vena jáne Barselona syndy qalalarda jaıaý júrginshige arnalǵan kósheler men velosıped joldary kóbeıip jatqanda, Berlın 30 km/saǵ jyldamdyq sheginen bas tartyp, velosıped jaldaý júıesine sýbsıdııa berýdi toqtatty.

Aıta keteıik, buǵan deıin Germanııa avtokólik ónerkásibi bir jylda 50 myńnan astam jumys ornyn qysqartqany habarlanǵan.