Germanııada «Ellı» tsıklonynyń áserinen qalyń qar jaýyp, kóktaıǵaq bolady

ASTANA. KAZINFORM — Sınoptıkterdiń boljaýynsha, búgin «Ellı» tsıklonynyń saldarynan Germanııada qalyń qar jaýyp, kóktaıǵaq bolady, dep habarlaıdy BILD.

Bılik pen tótenshe jaǵdaılar qyzmeti kólik keptelisi týraly eskertip, turǵyndardy múmkindiginshe úıde bolýǵa shaqyrady.

Germanııa kantsleri Frıdrıh Merts bastaǵan Hrıstıan-demokratııalyq odaǵynyń (CDU) basqarmasy qolaısyz aýa raıyna baılanysty Maıntste 9-10 qańtarǵa josparlanǵan jabyq otyrysty sońǵy sátte keıinge qaldyrdy. Sharaǵa 350-ge jýyq qatysýshy men 100-ge jýyq jýrnalıst keledi dep josparlanǵan bolatyn.

— Aýa-raıynyń qolaısyzdyǵy qazirdiń ózinde kólik qyzmetin toqtatty. Josparlanǵan 1090 reıstiń 120-sy Frankfýrt áýejaıynda, 35-i Mıýnhende jáne 30-y Berlın-Brandenbýrg áýejaıynda toqtatyldy. Shtýtgart áýejaıynda ushaqty muzdan tazartý úshin birneshe reıs keıinge qaldyryldy. Temirjolda da máseleler týyndady: Frankfýrt aımaǵynda keıbir poıyzdar toqtap, birazy 30 mınýtqa deıin keshigip jatyr, — dep habarlady Deutsche Bahn.

Birshama eldi mekende mektepter ýaqytsha jabyldy, keıbir sabaqtar onlaın rejımge kóshti. Tsıklonnyń áserinen jaraqat alatyndardyń kóbeıetinin eskergen aýrýhanalar daıyndyq jumystaryn bastap ketti. Quzyrly oryndar barar jeri joq adamdardyń qaýipsizdigine alańdap, olar úshin ýaqytsha jyly baspanalar ashyp jatyr.

Nemis meteorologııalyq qyzmetiniń habarlaýynsha, tsıklon eń aldymen eldiń shyǵys bólikterine, sonyń ishinde Harts taý jotasyna, sondaı-aq Bremen men Gambýrg arasyndaǵy aýmaqqa áser etedi.

Sınoptıkter Germanııanyń basym bóliginde qalyń qar jaýady dep boljaıdy. Búgin tańerteń eldiń ońtústigi men batysynda qar jaýyp, ekpindi jeldiń áserinen qardyń sońy jańbyrǵa ulasady. Meteorologtar bul jaǵdaıdy «naǵyz meteotrıller» dep atady, sondyqtan azamattarǵa jolǵa shyǵýǵa bolmaıtynyn eskertip, sapardan bas tartýǵa keńes beredi.

Eki kún buryn Frantsııada qalyń qardyń saldarynan joldar jabylyp, reıster keshikken bolatyn.