Germanııada elektrli samokat apatynan qaza tapqandar sany artty

ASTANA. KAZINFORM — 2024 jyly Germanııada polıtsııa elektrli samokattardyń qatysýymen 11 944 jol-kólik oqıǵasyn tirkedi, dep jazdy DW.

Bul ótken jylmen (9425) salystyrǵanda 27%-ǵa kóp. Federaldyq statıstıka basqarmasynyń (Destatis) málimetinshe, mundaı apattar saldarynan 27 adam qaza tapqan, 1513 adam aýyr jaraqat alǵan, al 11 433 adam jeńil jaraqat alǵan.

Qaıtys bolǵandar men zardap shekkenderdiń 83,9%-y — samokatty tizgindegender.

Zardap shekkenderdiń basym bóligi — 45 jasqa deıingi jastar, olardyń shamamen jartysy — 25 jasqa tolmaǵandar.

Apattardyń 21%-ynda sebep — joldyń nemese trotýardyń durys paıdalanylmaýynan bolǵan. Erejege saı, elektrli samokattar velosıped jolaqtarymen nemese arnaıy bólingen jolaqtarmen júrýi tıis. Eger ondaı jolaqtar bolmasa, olar joldyń jıegimen júrýi kerek.

Trotýarlar men jaıaý júrginshiler aımaǵymen júrýge tek arnaıy belgiler ruqsat bergen erekshe jaǵdaılarda ǵana bolady. Apattardyń ekinshi sebebi (12%) — alkogoldik ishimdik iship kólik júrgizý, al úshinshi orynda — jyldamdyqty asyrǵan jaǵdaılar. Germanııada jol qozǵalysyna ruqsat etilgen elektrli samokattardyń jyldamdyǵy 20 km/saǵ-tan aspaýy tıis.

2024 jyly Germanııada jalpy sany 290 701 adam jaraqat alǵan jol-kólik oqıǵasy tirkelgen. Onyń ishinde elektrli samokattarmen baılanysty apattar nebári 4%-dy quraıdy. Salystyrý úshin: velosıped qatysqan apattar jalpy oqıǵalardyń 32%-yn quraǵan.

Qazaqstanda da elektrosamokatpen júrý erejelerin kóbine jasóspirimder buzatynyn jazǵan edik.