Germanııada elektr energııasyna salynatyn salyq 20,5 ese azaıady

ASTANA. KAZINFORM — Germanııada 2027 jylǵy 1 qańtardan bastap elektr energııasyna salynatyn salyq 20,5 ese tómendeıdi. Bılik koalıtsııasy salyq mólsherlemesin Eýropalyq odaqtaǵy eń tómengi deńgeıge deıin túsirýge kelisti. Bul nemis otbasylarynyń elektr energııasyna jumsaıtyn shyǵynyn azaıtýǵa múmkindik beredi, dep habarlaıdy Euronews.

Germanııada elektr energııasyna salynatyn salyq 20,5 ese azaıady
Foto: Armenia Today

Qazir tutynýshylar ár kılovatt-saǵat elektr energııasy úshin 2,05 eýrotsent salyq tóleıdi. Ózgeris kúshine engennen keıin bul kórsetkish 0,1 eýrotsentke deıin tómendeıdi. Salyqtyq jeńildik jeke tutynýshylarǵa ǵana emes, shaǵyn jáne orta bıznesti qosa alǵanda, kásiporyndarǵa da qatysty bolady.

Verivox baǵalardy salystyrý qyzmetiniń esebinshe, ortasha otbasy aı saıyn shamamen 8 eýro, al jylyna 96 eýro únemdeı alady.

Mundaı kelisimge Germanııanyń bılik koalıtsııasyna kiretin partııalar arasyndaǵy 8 saǵatqa sozylǵan kelissózden keıin qol jetkizildi. Buǵan deıin kantsler Frıdrıh Merts salyqty tómendetýge ýáde bergen. Alaıda bastamany júzege asyrý qarjylandyrý máselesine qatysty kelispeýshilikterge baılanysty keıinge shegerilgen.

Endi salyqtyq jeńildikterge 5,4 mıllıard eýro bólý josparlanyp otyr. Bul qarajat jańartylatyn energııa kózderi salasyndaǵy sýbsıdııalardy qaıta bólý esebinen bólinbek. Ázirge qarjy tek 2027 jylǵa qarastyrylǵan. Sonymen qatar federaldyq bıýdjetke Býndestagtyń maquldaýy qajet.

Ózgerister avtokólik júrgizýshilerine de qatysty bolady. Bılik jeltoqsannyń sońynda merzimi aıaqtalatyn janarmaı baǵasyna qoıylǵan shekteýdi bastapqyda taǵy úsh aıǵa uzartýǵa kelisti. Buǵan qosa, qańtardan bastap janarmaıǵa ýaqytsha jańa jeńildik engizý josparlanyp otyr.

Degenmen bul sheshim qoǵamda pikirtalas týǵyzdy. Synshylar salyqty barlyq tutynýshyǵa birdeı tómendetý halyqtyń tabys deńgeıindegi aıyrmashylyqty eskermeıtinin aıtady. Sondaı-aq janarmaıǵa beriletin jeńildikterdiń saqtalýy ekologııalyq taza energııa kózderine kóshý qarqynyna keri áser etýi múmkin degen alańdaýshylyq bar.

Germanııada elektr energııasynyń qoljetimdiligi máselesi áli de ózekti. Verivox baǵalaýynsha, G20 elderiniń arasynda elektr energııasy eń qymbat memleket — Germanııa.

Buǵan deıin sarapshy Qazaqstandaǵy energııa tapshylyǵyn sheshý joldaryn ataǵan edi.