Germanııada eldiń eń kóne atom elektr stantsııasynyń munaralary qıratyldy

ASTANA. KAZINFORM — Bavarııa aımaǵynda ornalasqan burynǵy Gýndremmıngen atom elektr stantsııasynyń bıiktigi 160 metr bolatyn eki salqyndatqysh munarasy jarý arqyly qıratyldy, dep habarlaıdy Kazinform agenttigi Bild basylymyna silteme jasap.

Bul oqıǵa stantsııany tolyq demontajdaý jumystarynyń eń aýqymdy ári kózge kórinerlik kezeńi boldy. Gýndremmıngen AES-i óz jumysyn 2021 jyldyń sońynda tolyq toqtatqan.

Sońǵy birneshe jyl ishinde stantsııa aýmaǵynan shamamen 4700 tonna qurylys materıaly shyǵarylǵan. Al sońǵy jarylys nátıjesinde taǵy 56 myń tonna temirbeton joıylyp, ol keıinirek qıyrshyq tas pen qurylys shıkizatyna qaıta óńdelmek.

Jarylys operatsııasyn oryndaý úshin myńnan astam tesik burǵylanyp, olarǵa jarylǵysh zattar ornalastyrylǵan.

Gýndremmıngen atom elektr stantsııasy Germanııanyń atom energetıkasy tarıhynda mańyzdy oryn alady. Sebebi dál osy jerde 1966 jyly Federatıvtik Respýblıkadaǵy alǵashqy iri ıadrolyq reaktor iske qosylǵan edi.

Aıta keteıik, Germanııada qus tumaýy órshise, jumyrtqa men qus eti tapshy bolýy múmkin ekenin jazǵanbyz.