Germanııada drondarǵa shekteý kúsheıip, buǵynyń tólderin qutqarý qıyndady

ASTANA. KAZINFORM – Germanııada dron ushýǵa qoıylǵan shekteýlerdiń kúsheıýi buǵynyń jańa týǵan tólderin qutqarý jumystaryn qıyndatyp otyr, dep habarlaıdy DW.

Shóp shabý maýsymy kezinde buǵynyń tólderi bıik shóptiń arasynda jıi jasyrynyp jatady. Ómiriniń alǵashqy aptalarynda olardyń qorǵaný qabileti tolyq qalyptaspaıtyndyqtan, qaýip tóngende qashpaı, kerisinshe tyǵylyp qalady. Sonyń saldarynan olar shóp shabatyn tehnıkanyń astynda qalyp qoıýy múmkin.

Mundaı jaǵdaılardyń aldyn alý úshin fermerler jylý kamerasymen jabdyqtalǵan drondardy paıdalanyp kelgen. Olardyń aıtýynsha, bul – qazirgi tańda eń tıimdi tásilderdiń biri.

Alaıda sońǵy ýaqytta, ásirese áýejaılar mańynda dron ushyrýǵa ruqsat berý azaıǵan. Bul óz kezeginde tólderdiń ómirine tónetin qaýiptiń artýyna ákelip otyr.

Sonymen qatar Germanııa zańnamasyna sáıkes fermerler janýarlardyń qyrylýyna jol bermeý úshin tıisti sharalar qabyldaýǵa mindetti. Áıtpese, olarǵa qatań jaza qoldanylýy múmkin.

Mıýnhen áýejaıyna jaqyn mańda ornalasqan alqaptardyń ıesi fermer Mıhael Pelmaıer balama tásilderdi qoldanýǵa nıetti. Ol, mysaly, akýstıkalyq úrkitkish qurylǵylardy paıdalanýdy josparlap otyr. Degenmen ol janýarlar ólimi artýy múmkin ekenine alańdaýly.

Aıta keteıik, 2025 jyly Germanııa áýe keńistiginde drondar men ushaqtardyń qaýipti jaqyndasý jaǵdaılary jıilegen. Byltyr qańtar-qarasha aralyǵynda mundaı 208 oqıǵa tirkelgen.

Buǵan deıin Qaraqalpaqstanda rezervat qyzmetkerleri Qyzyl kitapqa engen 3 Buhar buǵysyn aýlaǵany habarlandy.