Germanııada dızel baǵasy tarıhı rekord jańartty

ASTANA. KAZINFORM – Germanııada dızel otynynyń baǵasy tarıhı eń joǵary deńgeıge jetti. Buǵan AQSh pen Iran arasyndaǵy qaqtyǵys saldarynan munaı baǵasynyń ósýi áser etken, dep habarlaıdy Euronews.

2 sáýir kúni Germanııada dızel otynynyń baǵasy búkil el boıynsha lıtrine 2 eýro 34 tsentke deıin kóterilip, jańa rekord ornatty. Bul qatarynan ekinshi kúngi rekordtyq kórsetkish. Mundaı derekterdi Germanııanyń jalpyǵa ortaq avtomobıl klýby (ADAC) jarııalady.

Aldyńǵy kúnmen salystyrǵanda baǵa 1,9 tsentke ósken. Osylaısha 2022 jyldyń kóktemindegi rekordtyq deńgeıden asyp tústi. Sonymen qatar Super E10 markaly benzın baǵasy da ósip, lıtrine 2,141 eýroǵa jetip, bıylǵy eń joǵary deńgeıin kórsetti.

Sarapshylardyń aıtýynsha, baǵa rekordy janarmaı quıý beketterindegi baǵany turaqtandyrýǵa baǵyttalǵan «avstrııalyq model» engizilgennen keıin tirkelgen. Alaıda bul retteý baǵany shekteýdiń ornyna, kerisinshe, ósimge yqpal etken.

Avtomobıl klýbynyń pikirinshe, shıki munaı baǵasynyń ósýi baǵanyń qymbattaýyn tolyq túsindire almaıdy. Munaı kompanııalary bolashaqtaǵy táýekelderdi aldyn ala eskerip, kúndelikti baǵaǵa qosyp otyrǵany baıqalady.

Baǵanyń ósýine negizgi sebepterdiń biri – AQSh pen Iran arasyndaǵy qaqtyǵys. Sonyń saldarynan Ormýz buǵazy arqyly erkin keme qatynasy toqtaǵan. Bul baǵyt arqyly álemdik munaıdyń shamamen besten biri tasymaldanatynyn eskersek, qysqa merzim ishinde Brent markaly munaı baǵasy barreline 72 dollardan 120 dollarǵa deıin ósken.

Soǵys bastalǵanǵa deıin, aqpan aıynyń sońynda Germanııadaǵy janarmaı baǵasy qazirgi deńgeıden 50-60 tsentke tómen bolǵan.

Qarsy shara retinde júrgizýshiler energııa tasymaldaýshylarǵa salynatyn salyqty Eýropalyq odaqtaǵy eń tómengi deńgeıge deıin ýaqytsha tómendetýdi usynyp otyr. Olardyń pikirinshe, bul dızel men benzın baǵasyn lıtrine shamamen 15 tsentke arzandatýy múmkin.

Sonymen qatar Germanııanyń Federaldyq kartelge qarsy vedomstvosy baǵanyń negizsiz ósýine jol bermeý úshin keńeıtilgen ókilettikterin paıdalanýy tıis. 1 sáýirden bastap munaı kompanııalary baǵanyń kóterilý sebepterin túsindirýge mindettelgen.

Jańa erejege sáıkes, janarmaı quıý beketterine táýligine tek bir ret – túski ýaqytta baǵany kóterýge ruqsat etiledi. Al baǵany tómendetý kez kelgen ýaqytta múmkin. Bul shara tutynýshylardy negizsiz qymbattaýdan qorǵaýǵa baǵyttalǵan. Erejeni buzǵandarǵa 100 myń eýroǵa deıin aıyppul salynýy múmkin.

Alaıda ázirge bul sheshim aıtarlyqtaı nátıje bermegen. Sarapshylardyń aıtýynsha, kompanııalar kún ishinde baǵany ózgerte almaıtyndyqtan, táýekelderdi aldyn ala baǵaǵa engizýge tyrysady.

Buǵan deıin qymbat dızel Germanııadaǵy tasymal sektoryn daǵdarysqa ushyratyp otyrǵany habarlanǵan edi.