Germanııada dárigerler otshashýǵa tyıym salýdy usyndy

ASTANA. KAZINFORM — Germanııada Jańa jyl qarsańynda turǵyndardyń otshashý paıdalanýyna tyıym salý máselesi qyzý talqylanyp jatyr, dep habarlaıdy DW.

Bul qadamǵa medıtsınalyq qaýymdastyqtyń shaǵymy sebep boldy. Merekede jedel járdem bólimshelerinde júkteme shamadan tys artyp, jaraqattanǵandar sany kóbeıedi. Alaıda pırotehnıkalyq buıymdarmen aınalysatyn mamandar másele zańdy otshashýlardan emes ekenin aıtty.

Nemis pırotehnıkter jáne kórkem otshashýlar qaýymdastyǵynyń (bvpk) basshysy Krıstof Krepl jazataıym oqıǵalar tek zańsyz otshashýlardyń saldarynan bolatynyn atap ótti.

Onyń aıtýynsha, satýǵa ruqsat etilgen otshashýlar qatań synaqtan ótip, qýaty men kólemine shekteý qoıylǵan. Ruqsat berilgen jańajyldyq otshashýlar máseleni ampýtatsııaǵa deıin aparmaıdy.

Alaıda ol qaýipti zańsyz otshashýlar burynǵydan da qoljetimdi ekenin moıyndady. Sondaı-aq máselege saıasatkerler jappaı tyıym salýdan góri, jaǵdaıdy udaıy baqylap, qoldanystaǵy zańdardy oryndaýy kerek ekenin eskertti.

Buǵan deıin Germanııanyń Federaldyq medıtsınalyq qaýymdastyǵy otshashýlarǵa tolyq tyıym salýǵa shaqyrǵan. Uıymnyń prezıdenti Klaýs Raınhardt jańa jyl qarsańynda elde pırotehnıkadan jaraqat alatyndar kóbeıip, aýyr kúıik shalý faktileri tirkelgenin, bul aýrýhanalardy shekti deńgeıge jetkizgenin atap ótti.

Al Krıstof Krepl medıtsına qyzmetkerleriniń jumys júktemesiniń basty sebebi otshashý degenge kelispeıdi. Ol merekelik maýsymda alkogoldi kóp tutyný áldeqaıda úlken ról atqaratynyn aıtty.

Germanııanyń kólik mınıstri Patrık Shnıder de otshashýlarǵa tyıym salýǵa qarsy shyqty. Ol barlyq máseleni tyıym salýmen sheshýge bolmaıtynyn aıtyp, Jańa jyl qarsańynda otshashýdy uıymdastyrý Germanııada burynnan bar dástúr ekenin atap ótti. Alaıda mınıstr ózi otshashýdy jaqsy kórmeıtinin moıyndady.

Budan buryn otshashýdy qalaı zańdy, ári qaýipsiz qoldanýǵa bolatyny týraly jazdyq.