Germanııada Býndestagtyń kóshi-qon saıasatyna qarsy birneshe myńdaǵan adam qatysqan sherý ótti
ASTANA. QazAqparat - Germanııa astanasy - Berlın qalasynda qazirgi bıliktiń áreketine qarsylar ózderiniń elge tolastamaı aǵylyp jatqan mıgranttarǵa qarsylyǵyn bildirý úshin sherýge shyqty. Berlın kóshelerimen bes myńǵa tarta adam sherýletip ótti, dep habarlady sheteldik aqparat agenttikteri.
Jergilikti bılik málimetteri boıynsha, sherýdi nemistiń «Germanııa úshin balama» eýroskeptıkter partııasy uıysmdastyrǵan. Onyń uıymdastyrýshysy - «Germanııa úshin balama» partııasynan Eýropalyq parlamentke depýtat Beatrıks fon Shtroh qarsylyq eń aldymen GFR úkimetiniń múshelerine baǵyttalǵanyn aıtty. Sherýge shyqqandar «Germanııany qutqarý kerek. Angeldi toqtatý kerek» degen urandar alyp shyqty. Sonymen birge el astanasynda Angela Merkeldiń áreketterin jáne saıasatyn qoldaıtyndar da sherý uıymdastyrdy. Olar óz qatarlaryna 800-ge tarta adamdy jınady, dep habarlady "Oreanda-Novostı".
Budan buryn Germanııa ІІM 2015 jyldyń basynan beri keminde 758 myń adam baspana izdep Germanııaǵa kelgenin habarlaǵan edi. Ótken jyly kelgen mıgranttar tórt ese az bolatyn. Kelýshilerdiń árbir úshinshisi - Sırııa azamattary. Qazan aıynda ǵana 181 myń mıgrant keldi, qyrkúıekte bul tsıfr 20 myńdaı az bolatyn. Aǵymdaǵy jyldyń sońyna deıin Germanııaǵa keletin mıgranttar sany bir mıllıon adamǵa jetýi múmkin. Sonymen qatar elge kelýshilerdiń qatarynda Irak pen Aýǵanstan elderinen bosqyndar bar.
Budan buryn GFR vıtse-kantsleri Zıgmar Gabrıel Germanııa birneshe jyl boıy jyl saıyn 500 myńǵa jýyq ımmıgranttardy qabyldaýdy josparlap otyr degen bolatyn. «Biz bir jylda jarty mıllıondaı bosqyndardy qabyldaı alamyz dep sanaımyn», - degen bolatyn ol.
Qarsylyq aktsııasy negizinen oqys oqıǵasyz ótti. Jergilikti polıtsııanyń málimetine qaraǵanda, radıkaldarmen qaqtyǵysta bir polıtseı jaraqat alǵan.
