Germanııada birer aptada úshinshi bankke ury tústi

ASTANA. KAZINFORM – Germanııanyń batysyndaǵy Soltústik Reın-Vestfalııa shtatyndaǵy bankterdiń birine ury túsken. Bul – keıingi birneshe kún ishindegi úshinshi bankti tonaý oqıǵasy, dep habarlaıdy Kazinform DW-ge silteme jasap.

Jergilikti polıtsııanyń habarlaýynsha, 30 jeltoqsan kúni jumys ýaqytynda Galle qalasyndaǵy temirjol vokzaly kóshesindegi bank bólimshesinde tórt seıf jáshigi buzylǵan. 

Keltirilgen shyǵyn kólemi áli anyqtalǵan joq. Qylmyskerler qoımaǵa naqty qalaı kirgeni de belgisiz. Al polıtseıler buzylǵan seıfterdiń ıelerimen baılanysqa shyqty. Quqyq qorǵaý organdary oqıǵanyń kýágeri bolýy múmkin kez kelgen adamdy baılanysqa shyǵýǵa shaqyrdy. 

Buǵan deıin Soltústik Reın-Vestfalııada Sparkasse bankiniń eki bólimshesi tonalǵan bolatyn. 

Birinshi tonaý oqıǵasy 17 jeltoqsanda Bonn qalasynda boldy, biraq bul týraly aıdyń sońynda ǵana habarlandy. Ortalyq Frıdensplatts alańyndaǵy Sparkasse bank bólimshesinde eki seıf buzylyp, kóp mólsherdegi baǵaly zattar, negizinen altyn urlanǵan. Polıtsııa qylmysqa 22 jastaǵy burynǵy bank qyzmetkeriniń kúdikke ilingenin habarlady.

– Kúdiktiniń úıine tintý júrgizilip, polıtsııa bólimshesine jetkizildi, biraq keıin ony ustaýǵa negiz tabylmaǵandyqtan bosatyldy, - dep habarlaıdy WDR. 

Buǵan deıin Germanııada urylar bankten shamamen 30 mln eýro tonap ketkenin jazǵanbyz. Urlyq 29 jeltoqsan kúni boldy. Sol kezde órt sıgnalızatsııasynyń iske qosylýyna baılanysty órt sóndirýshiler men polıtseıler bank ǵımaratyn teksergen.