Germanııada biryńǵaı jol júrý bıleti qoldanysqa engizildi
BERLIN. QazAqparat – Germanııada biryńǵaı jol júrý bıleti qoldanysqa engizildi. Ol kóliktiń barlyq derlik túrine jaramdy, dep habarlaıdy QazAqparat Euronews-ke silteme jasap.
Turǵyndardy qoǵamdyq kólikti paıdalanýǵa tartý naýqany aıasynda Germanııada jol júrý bıleti qoldanysqa engizildi. Biryńǵaı bılettiń baǵasy – 49 eýro.
El turǵyndary 1 mamyrdan bastap osy bıletpen poıyzda, tramvaı, avtobýs, metro men paromdarda júre bastady. Tek júrdek poıyzdar men alys qashyqtyqqa qatynaıtyn avtobýstarda jolaqysy bólek tólenedi.
Kólik mınıstriniń málimdeýinshe, bul – «aýanyń lastanýyn azaıtýǵa jáne qymbatshylyq daǵdarysyn eńserýge» baǵyttalǵan qadam.
Jol júrý bıletin smartfondardaǵy qosymsha arqyly nemese chıp-karta túrinde paıdalanýǵa bolady. Boljam boıynsha, bul bılettiń baǵasy birte-birte qymbattaýy múmkin.
Ótken jyldyń jazynda, 1 maýsym men 31 tamyz aralyǵynda Germanııada 9 eýrolyq jol júrý bıleti bolǵan. Ony 50 mln astam adam paıdalanǵan.
Aıta ketsek, jeke kólikten bas tartý ıdeıasy Lıýksembýrgte tıimdi júzege asqan. Ol jaqta úsh jyl buryn qoǵamdyq kólikte júrý tegin boldy.
