Germanııada bıyl aptap ystyqtan 9,8 myńǵa jýyq adam kóz jumdy
ASTANA. KAZINFORM – Germanııada bıyl aptap ystyq saldarynan qaıtys bolǵandar sany 9 800 adamǵa jetip, 2016 jyldan bergi eń joǵary kórsetkish tirkeldi, dep habarlaıdy DW.
Mundaı málimetti eldiń Robert Koh atyndaǵy ınstıtýty (RKI) apta saıynǵy esebinde jarııalady.
19 shildedegi jaǵdaı boıynsha ystyqqa baılanysty ólim-jitim sany 9 800-ge jetken. Bul – 2016 jyldan beri kez kelgen tolyq jyldaǵy kórsetkishten joǵary. Mamandar muny jazdyń basynda eldi qamtyǵan uzaqqa sozylǵan aptap ystyqpen baılanystyrady.
2026 jylǵy eń aýyr kezeń maýsymnyń ekinshi jartysy boldy. Osy ýaqytta eldiń kóptegen óńirinde aýa temperatýrasy +40°C-qa deıin kóterilip, bes myńnan astam adam qaıtys bolǵan.
RKI málimetinshe, aptap ystyqqa eń osal top – egde jastaǵy adamdar. Qaza bolǵandardyń 7 880-i 75 jastan asqandar. Sondaı-aq qaıtys bolǵandardyń arasynda áıelder erlerge qaraǵanda kóp bolǵan. Alaıda mamandar muny egde jastaǵy turǵyndar arasynda áıelderdiń úlesi joǵary bolýymen túsindiredi.
Buǵan deıingi eń joǵary kórsetkish 2018 jyly tirkelgen. Sol jyly aptap ystyqtyń saldarynan shamamen 8 900 adam kóz jumǵan.
Sarapshylardyń aıtýynsha, ystyqtyń ózi sırek jaǵdaıda ólimniń tikeleı sebebi bolady. Kóp jaǵdaıda joǵary temperatýra sozylmaly aýrýlarmen qatar kelip, adam ómirine qaýip tóndiredi.
Óz kezeginde Germanııanyń aýrýhanalar qaýymdastyǵy medıtsınalyq mekemelerdegi salqyndatý júıelerin shuǵyl jańǵyrtý qajettigin málimdedi. Uıymnyń dereginshe, qazirgi ýaqytta Germanııa aýrýhanalaryndaǵy palatalardyń az ǵana bóligi kondıtsıonerlermen nemese basqa da salqyndatý quraldarymen jabdyqtalǵan.
Aıta ketelik klımattyń ózgerýi saldarynan Germanııada ońtústik jylandary kóbeıip barady.
