Germanııada belgisiz bireý poıyz jolaýshylaryn pyshaqtaǵan
BERLIN. QazAqparat - Germanııada belgisiz bireý júrdek poıyzdaǵy jolaýshylarǵa shabýyl jasap, úsh adamdy pyshaqtaǵan. Bul týraly QazAqparat Bild basylymyna silteme jasap habarlaıdy.
Oqıǵa senbi kúni Bavarııanyń Joǵarǵy Pfalts aýdanynda Regensbýrgten Gambýrgke bara jatqan ICE júrdek jolaýshylar poıyzynda boldy. Kúdikti 27 jastaǵy arab tekti jigit ustaldy. Tergeýshiler ázirge lańkestik áreket nusqasyn joqqa shyǵaryp otyr. Er adamnyń psıhologııalyq problemalary bolýy múmkin. Kýágerlerdiń aıtýynsha, ol ózin durys ustamaǵan.
Tótenshe jaǵdaı kezinde poıyzda 300 adam bolǵan. Bild basylymynyń habarlaýynsha, abyroı bolǵanda Regensbýrgtegi fýtbol matchyna bara jatqan Bavarııa polıtsııasynyń arnaıy jasaqtary oqıǵa ornyna taıaý mańda bolǵan. Olar tez jetip, kúdiktini ustady.
Al Nordbayern portaly shabýyl jasaǵandardyń ekeý ekendigin habarlady.
Germanııanyń ishki ister mınıstriniń mindetin atqarýshy Horst Zeehofer polıtseıler men jolserikterge alǵys aıtty. «Der kezinde aralasýdyń arqasynda basqa adamdardyń ómirine qaýip tónip turǵan joq», - degen Zeehoferdiń sózin keltirdi Іshki ister mınıstrliginiń ókili Stıv Alter Twitter-de. «Qylmystyń mán-jaıy anyqtalmaǵan, qazir tergeý amaldary júrgizilýde», — dep atap ótken mınıstrdiń mindetin atqarýshy.
