Germanııada baspana suraǵan mıgranttar sany 2011 jyldan bergi eń tómengi deńgeıge tústi
ASTANA. KAZINFORM – Germanııada baspana surap alǵash ret ótinish bergender men halyqaralyq qorǵaý rásimi aıasynda jańadan kelgenderdiń sany 2011 jyldan bergi eń tómengi deńgeıge jetti, dep habarlaıdy Bild basylymy Germanııa Іshki ister mınıstrliginiń derekterine silteme jasap.
Resmı statıstıkaǵa sáıkes, bıyl qazan aıynda elde baspana berý týraly 5 707 bastapqy ótinish pen halyqaralyq qorǵaý rásimi aıasyndaǵy jańa kelý jaǵdaıy tirkelgen. Bul 2025 jyldyń qazan aıymen salystyrǵanda 40%-ǵa, al 2024 jyldyń sáıkes kezeńimen salystyrǵanda 70%-ǵa az.
Mundaı tómen kórsetkish sońǵy ret 2011 jyldyń qazan aıynda tirkelgen.
Germanııanyń Іshki ister mınıstri Aleksander Dobrındt Bild basylymyna bergen túsiniktemesinde bul jaǵdaıdy zańsyz kóshi-qonǵa qarsy kúrestegi betburys kezeńi dep baǵalady.
– Qazan aıynda Germanııada baspana berý týraly 5 707 bastapqy ótinish pen halyqaralyq qorǵaý rásimi aıasyndaǵy jańa kelý jaǵdaıy tirkeldi. Bul 2025 jyldyń qazan aıymen salystyrǵanda 40%-ǵa, al 2024 jylmen salystyrǵanda 70%-ǵa az. Mundaı tómen kórsetkish sońǵy ret 2011 jyldyń qazan aıynda tirkelgen, – dep jazady basylym.
Frıdrıh Merts Germanııa kantsleri qyzmetine kiriskennen keıin el úkimeti kóshi-qon saıasatyn qatańdatýǵa kiristi.
Іshki ister mınıstrligi shekaralyq baqylaýdy kúsheıtip, birqatar mıgrantty el aýmaǵyna kirgizýden bas tarta bastady.
2025 jyldyń mamyr aıynan beri Germanııa shekarasynan 47 551 adam keri qaıtarylǵan. Budan bólek, elge qaıta kirýge tyıym salynǵan 2 432 adam shekaradan ótkizilmegen.
Sonymen qatar Germanııada el aýmaǵynda zańdy túrde turýǵa quqyǵy joq adamdardy deportatsııalaý rásimin jeńildetetin zań kúshine endi.
Aıta keteıik, buǵan deıin Germanııada saıası baspana surap alǵash ret ótinish bergender sany 2012 jyldan bergi eń tómengi deńgeıge túskeni habarlanǵan edi. 2026 jylǵy 25 qyrkúıektegi jaǵdaı boıynsha 3 345 bastapqy ótinish tirkelip, bul kórsetkish byltyrǵy sáıkes kezeńmen salystyrǵanda 65%-ǵa azaıǵan.