Germanııada barlyq dúkender men mektepter ashylýda, al Býndeslıga 15 mamyrda oralady - BAQ
BRıÝSSELЬ. QazAqparat – Germanııa federaldyq úkimeti karantın sharalaryn jeńildetýge nıetti, biraq aýrý juqtyrýshylar sany kúrt ósken jaǵdaıda tótenshe jaǵdaı rejımin qaıta engizýi múmkin, dep habarlaıdy QazAqparat menshikti tilshisi DPA agenttigine silteme jasap.
Kantsler Angela Merkel men 16 óńirdiń úkimet basshylary sársenbi kúni tústen keıin telefon konferentsııasyn júrgizip, vırýstyń taralýynyń aldyn alý úshin engizilgen shekteýlerdi jeńildetetini týraly kelisedi.
Sheshim jobasyna sáıkes, federaldyq úkimet iri sharalardy ótkizýge, sonyń ishinde festıvaldar men sporttyq sharalarǵa tamyz aıynyń sońyna deıin tyıym salady. Berlın búkil el aýmaǵyndaǵy dúkenderdiń ashylǵanyn qoldap otyr. Degenmen, klıentter arasyndaǵy qashyqtyq 1,5 metr bolýy mindetti.
Federaldyq úkimet balalardyń qaýipsizdigin qamtamasyz etý boıynsha qatań nusqaýlyqtarǵa sáıkes, barlyq mektep oqýshylarynyń jazǵy kanıkýldarǵa shyǵýy úshin synyptarǵa kezeń-kezeńimen oralýyn qarastyryp jatyr.
Býndeslıga mamyr aıynyń ortasynda matchtarǵa ruqsat beredi. Biraq, olar eki aptalyq karantındi saqtaýy tıis. Kórermensiz ótetin oıyndar 15 nemese 21 mamyrda bastalady dep josparlanýda.
Budan bólek, federaldyq úkimet koronavırýsqa qatysty qosymsha shekteýlerdi jeńildetý sharalaryna jaýapkershilikti federaldyq jerlerge bermekshi.
Angela Merkel 20 sáýirde aýrý juqtyrýdyń jańa jaǵdaılary ósetin bolsa, qatań shekteýlerdi qaıta engizetinin málim etti.
Avtory: Tımýr Dúısekeev
