Germanııada balalarǵa jasalatyn zorlyq-zombylyq 20% kóbeıdi
ASTANA. KAZINFORM — Germanııada bes jylda balalarǵa qatysty seksýaldy qylmystar sany shamamen 20 paıyzǵa ósti, dep jazady DW.
Germanııanyń quqyq qorǵaý organdary 2023 jyly bir jyl burynǵymen salystyrǵanda balalarǵa jynystyq zorlyq-zombylyq jasaý faktileri 5,5 paıyzǵa artqanyn habarlady.
2023 jyly eldiń quqyq qorǵaý organdary balalarǵa qatysty jynystyq zorlyq-zombylyqtyń 16 375 faktisin tirkedi, al 14 jasqa deıingi 18 497 bala zorlyq-zombylyq qurbany bolǵan.
Bul 2022 jylmen salystyrǵanda 7,7 paıyzǵa kóp.
Zardap shekken balalardyń 15 460-y — nemister (5 paıyzǵa ósti) jáne 3037-i — Germanııada turatyn sheteldikter (ósim — 24,1 paıyz).
«Germanııada kún saıyn 54 bala men jasóspirim seksýaldy zorlyq-zombylyqtyń qurbanyna aınalady, bul — jantúrshigerlik áreket», — dedi Germanııanyń ishki ister mınıstri Nensı Faezer.
Aıtýynsha, japa shekken balalardyń kópshiligi qylmyskerlerdi tanıdy, kóp jaǵdaıda ondaı áreketti otbasy músheleri jasaıdy.
Jyl ishinde balalar pornografııasyn óndirýge, taratýǵa, satyp alýǵa jáne saqtaýǵa qatysty isterdiń sany da aıtarlyqtaı ósken.
2023 jyly ondaı ister sany 45 191-ge jetken, bul 2022 jylmen salystyrǵanda 7,4 paıyzǵa artyq.
2019 jyldan beri mundaı qylmys úsh eseden asqan.
«Qylmyskerler esh jerde ózin qaýipsiz sezinbeýi kerek. Sondyqtan biz Internet provaıderlerinen qylmyskerlerdi anyqtaý jáne balalar men jasóspirimderdi jynystyq zorlyq-zombylyqtan qorǵaý úshin IP mekenjaılaryn saqtaýdy talap etýimiz kerek», — dedi Nensı Fezer.
