Germanııada balalarǵa mektepke barar jolda qaýip kóbeıgen
ASTANA. KAZINFORM – Germanııada balalardyń mektepke barar jolynda jaraqat alý jaǵdaıy jıilegen. Ásirese, velosıpedpen júretin joǵary synyp oqýshylary jıi jol apatyna túsedi, dep habarlaıdy DW.
Nemis mindetti saqtandyrý qoǵamynyń (DGUV) aldyn ala derekterine sáıkes, 2025 jyldyń qańtar-maýsym aılary aralyǵynda mektepke bara jatqan jolda 42 303 oqıǵa tirkelgen. Bul ótken jyldyń sáıkes kezeńimen salystyrǵanda shamamen 5 paıyzǵa kóp (2024 jyldyń alǵashqy jartyjyldyǵynda – 40 416 jaǵdaı).
Jol apattarynyń eń kóbi Tómengi Saksonııa federaldyq jerinde (ár 1000 saqtandyrylǵanǵa shaqqanda 6,4 jaǵdaı), eń azy Berlınde (3,2 jaǵdaı) tirkelgen.
Apattardyń shamamen jartysy velosıpedpen júrgen oqýshylarǵa qatysty. Kóbine 10-18 jas aralyǵyndaǵy jetkinshekter zardap shegedi. Bastaýysh synyp oqýshylary arasynda mundaı jaǵdaı sırek, óıtkeni mektepke deıingi qashyqtyq qysqa, jol yńǵaıly jáne balalardyń kóbi jaıaý qatynaıdy. Al úlken synyptarda velosıpedti jıi qoldanady.
DGUV saqtandyrý kompanııasy ata-analarǵa balalardy mektepke kólikpen jetkizýdi usynbaıdy.
«Mektep qaqpasyndaǵy kólik sany artqan saıyn, joldaǵy jaǵdaı da kúrdelene túsedi. Bul – mektepke qalaı jetkenine qaramastan barlyq balaǵa qaýip tóndiredi», – dedi DGUV basqarýshy dırektory Shtefan Fasshaýer.
Onyń pikirinshe, balalar mektepke ózdiginen barýdy úırenýi tıis.
Sonymen qatar ol qalalyq bılikke mektepke aparar kóshelerdi qaıta jobalaýǵa, tıisti jol belgilerin ornatýǵa basa nazar aýdarýdy usyndy.
Kompanııa ókilderi qaýipsiz mektep marshrýttaryn ázirleýdi, oqýshylar men ata-analardy qaýipti aımaqtarmen aldyn ala tanystyrýdy da jıiletý qajet dep esepteıdi.
Ata-analar arasynda júrgizilgen saýalnama nátıjesinde, respondentterdiń 56 paıyzy velosıped joldarynyń joqtyǵyn balalardyń qaýipsizdigine basty qater dep ataǵan. Jartysynan kóbi baǵdarshamy joq ótkelderdi de problemaǵa jatqyzdy.
Jalpy jaǵdaıdy jaqsartý úshin ata-analar birneshe sharany atap ótti: jyldamdyqty 30 km/saǵ-qa deıin shekteý, mektep aınalasynda qozǵalysty shekteý aımaqtaryn qurý, sondaı-aq arnaıy «ata-analarǵa arnalǵan turaq oryndaryn» engizý. Muǵalimder bolsa, basty qaýip avtokólikterden keletinin atap ótti.
Germanııadaǵy barlyq mektep oqýshylary sabaq barysynda, úziliste, mektepke barar jáne qaıtar jolda, sondaı-aq mektep merekeleri men ekskýrsııa kezinde jazataıym jaǵdaılardan saqtandyrylǵan. Zardap shekken balalarǵa tolyqqandy medıtsınalyq kómek kórsetiledi, al saqtandyrý emdelý men ońaltý shyǵyndaryn óteıdi.
Aıta keteıik, Germanııada merez ınfektsııasyn juqtyrǵandardyń sany kúrt ósti.