Germanııada balalarǵa koronavırýsqa qarsy vaktsına salynýy múmkin
BRıÝSSELЬ. QazAqparat – Germanııanyń densaýlyq saqtaý mınıstri Iens Shpan mektep oqýshylary úshin «BioNTech-Pfizer» vaktsınasyn rezervteý qajettigi týraly aıtty, dep habarlaıdy, QazAqparat menshikti tilshisi.
Densaýlyq saqtaý vedomstvosy basshysynyń aıtýynsha, balalar úshin «BioNTech-Pfizer» vaktsınasyn saqtaý – jazǵy demalystan keıin Germanııanyń orta mektepteriniń ashylýyn qamtamasyz etýdiń tıimdi ádisi.
Maqsatymyz – osy jyldyń tamyz aıynyń sońyna qaraı vaktsınany barlyq mektep oqýshysyna usyný, dep atap ótti I. Span.
Nemis jáne amerıkalyq kompanııalar birlesip shyǵarǵan vaktsına – bul 12 jastan 15 jasqa deıingi balalar arasynda qoldanýǵa arnalǵan Eýropalyq dári-dármek agenttiginiń saraptamasynan ótip jatqan jalǵyz preparat.
Germanııada barlyq nemis jerinde mektepterdi jabýdyń jáne qaıta ashýdyń biryńǵaı erejeleri bar. «Shuǵyl tejeý» mehanızmi, eger aýrý deńgeıi qandaı da bir ákimshilik birlikte 100 myń adamǵa shaqqanda jańa COVID-19 juqtyrý jaǵdaılarynyń sany 165-ten asyp ketse, mektepterde sabaq berý tolyǵymen toqtatylatynyn bildiredi.
Eger aýrý deńgeıi osy deńgeıden tómen tússe, qashyqtan jáne kúndizgi oqý formaty engiziledi.
«BioNTech-Pfizer» vaktsınasyn Kanada men AQSh 12-15 jas aralyǵyndaǵy balalarǵa qoldanady.
Avtor: Arnur Rahymbekov
