Germanııada balalar syrǵanaǵy qoǵamdyq kólikke aınaldy
ASTANA. KAZINFORM — Germanııanyń ońtústigindegi Kalv qalasynda turǵyndardyń taýdan tómenge tez túsýi úshin erekshe kólik júıesi iske qosyldy. Qala bıligi saıabaqtaǵy eki alyp syrǵanaqty qoǵamdyq kólik ınfraqurylymynyń bir bóligi retinde paıdalanýdy bastady. Bul týraly DW jazdy.
Kalv qalasy oıpatta ornalasqan jáne jan-jaǵyn tóbeler qorshap jatyr. Sol tóbelerdiń birinde qalalyq saıabaq pen eki oqý orny ornalasqan. Qala ortalyǵyna jyldamyraq jetý úshin bılik tóbeden tómen qaraı túsetin eki úlken syrǵanaq ornatqan.
Olardyń biriniń uzyndyǵy – 43 metr, ekinshisi – 17 metr.
Resmı málimet boıynsha, syrǵanaqpen tómen túskendegi jyldamdyq saǵatyna 35 shaqyrymǵa deıin jetýi múmkin. Birinshi syrǵanaqtan túsýge shamamen 5-8 sekýnd, al ekinshisine 10-16 sekýnd ýaqyt ketedi. Al osy qashyqtyqty jaıaý júrip ótý birneshe mınýtty alady.
Qala bıligi syrǵanaqtardy saıabaqqa kelýshiler, stýdentter jáne qoǵamdyq kólik aıaldamasyna nemese avtoturaqqa tezirek jetýdi qalaıtyn turǵyndar turaqty paıdalanatynyna úmitti.
Osylaısha, Kalv qalasynda balalardyń kóńil kóterýine arnalǵan nysan turǵyndardyń kúndelikti júrip-turýyna kómektesetin erekshe kólik quralyna aınaldy.
Aıta keteıik, Germanııanyń Volkswagen avtokontserni qatań únemdeý sharalary aıasynda eldegi tórt zaýytta óndiristi toqtatý týraly sheshim qabyldady.
