Germanııada azamattyq alý talaptary kúsheıtilýi múmkin
ASTANA. KAZINFORM – Germanııada HDS/HSS konservatıvtik blogynyń saıasatkerleri 2025 jyly azamattyq alǵan sheteldikter sany alǵash ret 300 myń adamnan asyp ketkendikten azamattyq berý talaptaryn qatańdatýdy usyndy, dep habarlaıdy Deutsche Welle basylymy.
Bul sońǵy 25 jyldaǵy rekordtyq kórsetkish boldy. Osyǵan baılanysty HDS/HSS ókilderi nemis tólqujatyn berý sharttaryn qaıta qaraýdy usyndy.
Konservatıvtik blok fraktsııasynyń ókili Aleksandr Trom Welt gazetine bergen suhbatynda azamattyq alý úshin qajet elde turý merzimin qaıtadan segiz jylǵa deıin uzartý kerek ekenin aıtty.
Sonymen qatar ol qos azamattyqqa beriletin jalpy ruqsatty alyp tastaýdy qoldady.
Tromnyń sózinshe, mundaı ózgeristerdi Germanııa sotsıal-demokratııalyq partııasymen koalıtsııalyq kelissózder barysynda qabyldatý múmkin bolmaǵan.
Buǵan balama retinde saıasatker Germanııada qorǵaý mártebesimen turǵan ýaqytty azamattyq alý merzimine qospaýdy usyndy. Mundaı jaǵdaıda sheteldikter aldymen turaqty turý quqyǵyn alýy kerek, tek sodan keıin ǵana natýralızatsııa merzimi eseptele bastaıdy.
Bul bastamany HDS ókili Roman Pozek te qoldady. Onyń pikirinshe, qos azamattyq «ıntegratsııany qıyndatady» jáne tek erekshe jaǵdaılarda ǵana ruqsat etilýi tıis.
Jańa shekteýlerge Solshyl partııa ókilderi qarsy shyqty.
Depýtat Klara Bıýnger mundaı usynystardy Germanııada jyldar boıy eńbek etip, qoǵamnyń bir bóligine aınalǵan adamdarǵa jasalǵan «shapalaq» dep atady.
Onyń aıtýynsha, «synaq merzimin» uzartýdyń ornyna mıgranttardyń qoǵamdyq ómirge aralasýyn kúsheıtip, azamattyq alýdy jeńildetý qajet.
Buǵan deıin Germanııanyń sheteldik joǵary oqý oryndarymen birlesken akademııalyq baǵdarlamalardy qysqartatyny habarlandy.
Eske sala ketsek, Germanııa turǵyndarynyń shamamen 70%-y qarjylyq jaǵdaıyna alańdaıtynyn jazdyq.
Al Qazaqstanda qansha etnıkalyq nemis turatynyn myna jerden oqı alasyz.
