Germanııada áıelderge qatysty zorlyq-zombylyq jaǵdaılary kóbeıdi

ASTANA. KAZINFORM — Ótken jyly Germanııa polıtsııasy áıelderge qarsy jasalǵan qylmystardyń aıtarlyqtaı óskenin tirkedi, dep habarlaıdy AZERTADJ.

308 áıel men qyz bala qaza tapqan, olardyń ishinde 191-i jubaılary, burynǵy seriktesteri nemese otbasy músheleriniń qolynan qaza tapqan.

Bul týraly Germanııanyń Federaldy qylmystyq polıtsııa basqarmasy usynǵan esepte aıtylǵan.

Áıelderge qatysty zorlyq-zombylyq jónindegi esepke sáıkes, 2024 jyly turmystyq zorlyq-zombylyq qurbandarynyń sany shamamen 266 myń adamǵa jetti. Bul aldyńǵy jylmen salystyrǵanda 10 myńǵa kóp.

Germanııanyń ishki ister mınıstri Aleksandr Dobrındt esebiniń tanystyrylymy barysynda oqıǵalardyń basym kópshiligi turmystyq zorlyq-zombylyqpen baılanysty ekenin aıtty.

— Saıasatkerler áıelderdi qorǵaý úshin áli de jetkilikti sharalar qabyldap jatqan joq, — dep moıyndady mınıstr.

Germanııanyń otbasy isteri jónindegi federaldy mınıstri Karın Prınniń aıtýynsha, jalpy kórsetkishter orta eseppen ár saǵat saıyn 15 áıeldiń turmystyq zorlyq-zombylyq qurbanyna aınalatynyn bildiredi. Prın bul kórsetkishterdi «dramatıkalyq» dep atap, esepke alynbaǵan jasyryn derekterdiń budan da kóp bolýy múmkin ekenin aıtty.

Mınıstr Dobrındt sondaı-aq turmystyq zorlyq-zombylyqqa kúdiktilerdiń úshten birinen astamy (37%) Germanııa azamattary emes ekenin atap ótti. Jábirlenýshilerdiń de shamamen úshten biri Germanııa azamattyǵyna ıe emes.

Bul derekterge baılanysty qoǵamdyq uıymdar áıelderge arnalǵan daǵdarys ortalyqtaryn qarjylandyrýdy qamtamasyz etýge shaqyrdy.

Parıtettik áleýmettik qamsyzdandyrý qaýymdastyǵynyń bas dırektory Ioahım Roktyń aıtýynsha, el boıynsha áıelderge arnalǵan baspanalarda áli de 12 myńnan astam oryn jetispeıdi.

Budan burynGermanııa sırııalyq bosqyn úmitkerlerinen jappaı bas tarta bastaǵany belgili boldy.