Germanııada áýe bıletteriniń salyǵy tómendedi
ASTANA. KAZINFORM – Germanııa Býndestagy elden ushatyn reısterge arnalǵan áýe bıletterine salynatyn salyqty tómendetý týraly zań jobasyn qabyldady, dep habarlaıdy DW.
Jańa zań 2026 jyldyń shilde aıynan bastap kúshine enedi.
Qujatqa sáıkes, qysqa qashyqtyqtaǵy reıster úshin salyq 2,50 eýroǵa, orta qashyqtyqtaǵy baǵyttar boıynsha 6,33 eýroǵa, al alys magıstraldi reıster úshin 11,40 eýroǵa azaıady.
Buǵan deıin bul bastamany Germanııa úkimeti maquldaǵan bolatyn.
Atalǵan shara Germanııadaǵy bıleýshi partııalardyń koalıtsııalyq kelisimindegi tarmaqtardyń biri sanalady. Alaıda salyqtyń tómendeýi memleket bıýdjetine jyl saıyn birneshe júz mıllıon eýro shyǵyn ákelýi múmkin.
Zań jobasynda 2026 jyly bıýdjet kirisiniń tapshylyǵy 185 mıllıon eýro bolady dep boljanǵan. Al 2030 jylǵa qaraı bul kórsetkish 355 mıllıon eýroǵa deıin ósýi yqtımal.
Sonymen qatar týrıster úshin áýe bıletteriniń naqty arzandaıtyny ázirge belgisiz bolyp otyr.
Áýe kompanııalary únemdelgen qarajatty Taıaý Shyǵystaǵy soǵys saldarynan qymbattaǵan avıaotyn shyǵyndaryn jabýǵa jumsaýy múmkin.
Aıta keteıik, Germanııada janarmaı baǵasy birneshe aıdaǵy eń tómen deńgeıge tústi.
