Germanııada áskerı qyzmetten bas tartqandar sany kúrt ósti
ASTANA. KAZINFORM — Funke medıatobynyń málimetinshe, 2026 jyldyń qańtarynan tamyz aıynyń sońyna deıin Germanııanyń Otbasy jáne azamattyq qoǵam máseleleri jónindegi federaldyq vedomstvosyna áskerı qyzmetten bas tartý týraly 12 102 ótinish túsken, dep jazady DW.
Osylaısha, olardyń sany 2025 jyldyń búkil kórsetkishinen úsh eseden astam asyp otyr. Byltyr mundaı 3 879 ótinish tirkelgen.
Bul rette vedomstvo ótinishterdi qaraý kezinde eleýli qıyndyqtar týyndaǵanyn habarlady. Vedomstvo ókiliniń aıtýynsha, «durys mekemege joldanbaǵan ótinishter óte kóp», sondyqtan olar «qaralmastan keri qaıtarylýy tıis».
Ótinishter sanynyń kúrt ósýine qaýipsizdik salasyndaǵy shıelenisti jaǵdaı jáne Býndesverge shaqyrý júıesin reformalaý týraly 1 qańtardan bastap kúshine engen zań sebep boldy. Qujatqa sáıkes, 2026 jyldan bastap 18 jastaǵy er azamattar Germanııa qarýly kúshterine qosylýǵa daıyn ba degen suraqqa jaýap beretin saýalnamany toltyrýy tıis.
Jastardyń áskerı qyzmetten aldyn ala bas tartatynyn málimdeýge quqyǵy bar.
2011 jyly toqtatylǵan mindetti áskerı qyzmet Býndestagtyń sheshimimen qaıtadan ishinara engizilýi múmkin. Eriktiler sany qajetti deńgeıge jetpegen jaǵdaıda «qajettilik týyndaǵan kezdegi áskerı mindet» dep atalatyn tetik iske qosylýy josparlanyp otyr.
2035 jylǵa qaraı Germanııanyń áskerı qyzmettegi azamattarynyń sanyn 186 myńnan 260 myńǵa deıin arttyrý kózdelgen.
Buǵan deıin Germanııada saıası baspana suraǵandar sany 2012 jyldan bergi eń tómen deńgeıge túskenin jazǵanbyz.
