Germanııada árbir tórtinshi áskerı mindetti Qorǵanys mınıstrliginiń saýalnamasyn elemegen
ASTANA. KAZINFORM – Germanııada áskerı esepke alý júıesin qalpyna keltirýge baǵyttalǵan jańa naýqan qıyndyqtarǵa tap boldy. 18 jastaǵy er azamattardyń 28%-y Býndesverdiń mindetti saýalnamasyna jaýap bermegen, dep habarlaıdy BILD.
Zań talaptaryna sáıkes, áskerı qyzmetke daıyndyq týraly málimetter bir aı ishinde usynylýy tıis. Alaıda saýalnama jiberilgen azamattardyń tórtten birinen astamy bul mindetti oryndamaǵan.
Germanııanyń Qorǵanys mınıstrligi mundaı áreketke kóz juma qaramaıtynyn málimdedi. Saýalnamany toltyrmaǵan azamattarǵa endi aıyppul salynýy múmkin.
Vedomstvonyń málimetinshe, saýalnamaǵa jaýap bergenderdiń shamamen jartysy alty aıdan kem emes merzimge erikti áskerı qyzmet atqarýǵa qyzyǵýshylyq bildirgen.
Jastar úshin sheshýshi faktorlardyń biri – turǵylyqty jerine jaqyn áskerı bólimde qyzmet etý múmkindigi.
Jyl basynan beri shamamen 194 myń adamǵa habarlama joldanǵan. Er azamattar úshin saýalnamaǵa qatysý mindetti bolsa, áıelder oǵan óz erkimen qatysa alady.
Germanııanyń Qorǵanys mınıstri Borıs Pıstorıýs 2035 jylǵa qaraı armııa sanyn 260 myń áskerı qyzmetkerge deıin jetkizýdi josparlap otyr.
Eger erikti qatysýǵa negizdelgen qazirgi model kútken nátıje bermese, Germanııa bıligi kelesi kezeńge ótip, bos oryndardy tolyqtyrý úshin «qajettilik boıynsha shaqyrý» tetigin engizýi múmkin.
Sońǵy jyldary Eýropadaǵy qaýipsizdik ahýalynyń ózgerýine baılanysty birqatar memleketter áskerı daıyndyq pen áskerdi jasaqtaý júıesin kúsheıtýge kiristi. Germanııa da Býndesverdiń jaýyngerlik qabiletin arttyrý jáne jeke quram sanyn kóbeıtý baǵytynda reformalardy jalǵastyryp keledi.
Aıta keteıik, buǵan deıin Mercedes nelikten áskerı tehnıka shyǵarýdy qolǵa alǵaly otyrǵany habarlandy.
