Germanııada ár ekinshi turǵynnyń jeke baspanasy joq
ASTANA. KAZINFORM — Germanııa Eýropalyq Odaq elderi arasynda jeke baspanasy bar turǵyndardyń úlesi boıynsha sońǵy orynda tur. Úı sharýashylyqtarynyń nebári 43,5 paıyzy óz úıinde nemese páterinde turady, dep habarlaıdy BILD.
Pestel-Institut zertteýiniń málimetinshe, bul Germanııadaǵy sońǵy shamamen 20 jyldaǵy eń tómen kórsetkish. Germanııa Eýropalyq Odaqtaǵy halyqtyń basym bóligi baspana jaldaıtyn jalǵyz el bolyp otyr.
Salystyrý úshin, Rýmynııa turǵyndarynyń shamamen 94 paıyzynyń jeke baspanasy bar, Slovakııada — 93 paıyz, Vengrııada — 92 paıyz. Bul kórsetkish boıynsha sońǵy orynnan ekinshi turǵan Aýstrııada jeke baspanasy bar turǵyndardyń úlesi shamamen 54 paıyzdy quraıdy.
Bul rette Germanııa óńirlerindegi jaǵdaı aıtarlyqtaı erekshelenedi. Saar jerinde turǵyndardyń 60 paıyzǵa jýyǵynyń jeke baspanasy bar, Brandenbýrgte — 44 paıyzdan astam. Berlınde bul kórsetkish shamamen 16 paıyzdy, al Gambýrgte 20 paıyzdan sál asady.
Eldiń jas turǵyndary arasynda jeke baspana ıeleriniń úlesi ásirese tómen. 25 pen 45 jas aralyǵyndaǵy nemisterdiń tórtten úshine jýyǵy baspana jaldaıdy, al shamamen ár tórtinshi adamnyń jeke jyljymaıtyn múlki bar.
Sarapshylar negizgi sebepterdiń qatarynda qurylys pen jer ýchaskeleriniń qymbattyǵyn, nesıe mólsherlemeleriniń ósýin, sondaı-aq memlekettik qoldaýdyń jetkiliksizdigin ataıdy. Sonyń saldarynan jeke jyljymaıtyn múlik satyp alý tipti eki tabys kózi bar kóptegen otbasylar úshin de qoljetimsiz bolyp otyr.
Sarapshylar bul jaǵdaıdyń uzaq merzimdi áleýmettik saldaryna da nazar aýdarady. Jeke jyljymaıtyn múlik kapıtal jınaqtaýdyń jáne zeınetke shyqqannan keıin qarjylyq turaqtylyqty qamtamasyz etýdiń bir joly retinde qarastyrylady. Qartaıǵan shaǵynda baspanany jalǵa alýdy jalǵastyrǵan adamdar qosymsha shyǵyndardy kóterýge májbúr bolady. Bul zeınetkerler arasynda kedeılik qaýpin arttyrýy múmkin.
Qazaqstanda baspana eń qymbat jáne eń arzan ornalasqan óńirler týraly silteme arqyly oqı alasyz.
