Germanııada aptap ystyqqa baılanysty joldarǵa sý shashyla bastady
ASTANA. KAZINFORM – Germanııada aptap ystyq saldarynan asfalttyń búlinýine jol bermeý úshin joldarǵa sý shashyla bastaldy.
Bul týraly Kazinform agenttiginiń menshikti tilshisi habarlady.
Germanııanyń jol qyzmetteri asfalt qatty qyzyp ketpeýi jáne joldardy jabýǵa májbúr bolmaý úshin jol jabynyn sýmen salqyndatyp jatyr.
«Joǵary temperatýra kezinde asfalt quramyndaǵy bıtým jumsaryp, jol betine shyǵa bastaıdy. Sonyń saldarynan jol jabyny jabysqaq bolyp, deformatsııaǵa ushyraıdy, al aýyr júk kólikteri ony tez buzady», – dep jazady Bild basylymy.
Osyndaı sharalar Soltústik Reın – Vestfalııa jáne Gessen federaldyq jerlerinde de synaqtan ótkizilip jatyr.
Aptap ystyqtyń saldarynan keı óńirlerde jol qozǵalysyna shekteý engizildi. Máselen, Gambýrgte asfalttyń búlinýine baılanysty uzyndyǵy eki shaqyrymnan asatyn jolaq ýaqytsha jabyldy.
Mamandardyń aıtýynsha, eski beton joldarda qaýip odan da joǵary. Qatty ystyqta beton plıtalar keńeıip, kóterilip, jarylyp ketýi múmkin.
Aıta keteıik, Germanııada 26 maýsym kúni aýa temperatýrasy tarıhı rekordqa jetti.
