Germanııada aptap ystyq saldarynan ormandar órtenip jatyr
ASTANA. KAZINFORM — Órt Potsdam-Mıttelmark aýdanyndaǵy Gertske mýnıtsıpalıteti mańynda tez taralyp, qazir jalyn sharpyǵan aýmaq shamamen 100 gektarǵa jetti. Órt sóndirýshiler senbiden beri aýa temperatýrasy 40°C-qa jýyq ystyqta tilsiz jaýmen kúresip jatyr, dep habarlaıdy Bild.
Tótenshe jaǵdaı qyzmetkerlerine aýyr tehnıka júrgizetin fermerler de kómektesip jatyr. Alaıda aptap ystyq pen uzaqqa sozylǵan qurǵaqshylyq órtti sóndirý jumystaryn edáýir qıyndatyp, jalynnyń odan ári taralý qaýpin kúsheıtip otyr.
Germanııanyń ózge óńirlerinde de ekstremaldy ystyq saldarynan orman órti tirkeldi. Reınland-Pfalts federaldyq jerindegi Traızen aýylynan shamamen 650 turǵyn qaýipsiz jerge kóshirildi.
Órt sóndirýshiler bul jalyn oshaǵyna jaqyndaı almaı otyr, óıtkeni aýmaqta soǵys kezinen jarylmaı qalǵan oq-dáriler bar. Ótken túni bul mańda birneshe jarylys boldy.
Buǵan deıin Germanııada bir kúnde ekinshi ret temperatýra rekordy tirkelgeni týraly habarladyq.
