Germanııada Angela Merkel mingen ushaqtyń bólshekteri kádesyıǵa aınaldy
ASTANA. KAZINFORM — Angela Merkel mingen Germanııanyń burynǵy úkimettik ushaǵynyń bir bólshegin endi kádesyı retinde ózińmen birge alyp júrýge bolady. Esepten shyǵarylǵan Airbus A340-300 «Konrad Adenaýer» ushaǵynyń syrtqy qaptamasynan kiltsalǵysh, júk bırkasy men stakan qoıatyn tuǵyrlar jasalǵan, dep habarlaıdy DW.
Tarıhı ushaq kádege jaramaı, jańa qoldanysqa ıe boldy. Germanııanyń Aviation Upcycling kompanııasy onyń túpnusqa alıýmınıı qaptamasynyń bólshekterinen kádesyılar jasap, satylymǵa shyǵardy.
Olardyń baǵasy da arzan emes. Ólshemi 9,5 × 9,5 santımetr bolatyn stakan qoıǵysh 89,20 eýroǵa, al kiltsalǵysh 79,29 eýroǵa baǵalanǵan. Soǵan qaramastan, eki ónim de satylyp ketken. Burynǵy úkimettik ushaqtyń bir bólshegin ıelengisi keletinder ázirge 34,66 eýrodan bastalatyn bagaj bırkalaryna tapsyrys bere alady.
Alaıda ushaqtyń barlyq bóligi qaıta óńdeýge jiberilgen joq. Ushaq korpýsynyń uzyndyǵy shamamen 30 metr bolatyn eń úlken bóligi Berlın-Gatov aerodromynda mýzeı eksponaty retinde saqtalady.
Mýzeıge kelýshiler Germanııanyń joǵary laýazymdy saıasatkerleri paıdalanǵan ushaq ishindegi bólmelerdi tamashalaı alady. Atap aıtqanda, ushqyshtar kabınasy, eki konferents-zal jáne delegatsııa basshysynyń jeke kabıneti saqtalǵan.
«Konrad Adenaýer» ushaǵy 2011 jyldan 2023 jylǵa deıin Germanııa úkimetiniń qyzmetinde boldy. Osy kezeńde ol eldiń kantslerlerin, prezıdentterin, Býndestag basshylary men syrtqy ister mınıstrlerin tasymaldady.
Ushaq qyzmetiniń basym bóligi Angela Merkeldiń kantslerlik kezeńimen tuspa-tus kelgendikten, oǵan beıresmı túrde «Merkeldiń ushaǵy» degen ataý berilgen.
Al 2022 jylǵy qarashada Germanııa Qarýly kúshteri úkimettik maqsatta paıdalanylatyn jańa Airbus A350-900XWB ushaǵyn qoldanysqa engizdi. Oǵan da Germanııa Federatıvtik Respýblıkasynyń alǵashqy kantsleri Konrad Adenaýerdiń esimi berildi.
Buǵan deıin Qytaıda salmaǵy 10 tonna bolatyn elektr ushaǵy ekıpajben birge alǵash ret áýege kóterilgenin habarlaǵan edik.