Germanııada Angela Merkel mingen ushaqtan kádesyılar jasaldy
ASTANA. KAZINFORM – Germanııanyń burynǵy úkimettik ushaǵy, Angela Merkel mingen Airbus A340-300 «Konrad Adenaýer» laıneriniń bólshekterinen kádesyılar jasaldy. Endi onyń alıýmınıı qaptamasynan daıyndalǵan buıymdardy satyp alýǵa bolady, dep habarlaıdy DW.
Tarıhı ushaq avıatsııalyq paıdaǵa jaratylmaı, ekinshi ómirge ıe boldy. Aviation Upcycling nemis kompanııasy laınerdiń túpnusqa alıýmınıı korpýsynan breloktar, bagaj japsyrmalary men bokal qoıatyn tuǵyrlar jasap, satylymǵa shyǵardy.
Kádesyılardyń baǵasy arzan emes. Ólshemi 9,5 h 9,5 santımetr bolatyn bokal tuǵyry 89,20 eýro, al brelok 79,29 eýro turady. Baǵasyna qaramastan, eki ónim túri de satylyp ketken. Burynǵy úkimettik ushaqtyń bir bólshegine ıe bolǵysy keletinder ázirge 34,66 eýrodan bastalatyn bagaj japsyrmalaryna tapsyrys bere alady.
Alaıda laınerdiń barlyq bóligi qaıta óńdeýge jiberilmegen. Fıýzelıajdyń uzyndyǵy shamamen 30 metr bolatyn eń úlken bóligi Berlın-Gatov aerodromynda mýzeı eksponatyna aınalady.
Kelýshiler Germanııanyń joǵary laýazymdy saıasatkerleri paıdalanǵan ushaq ishindegi bólmelerdi kóre alady. Olardyń qatarynda ushqyshtar kabınasy, eki májilis zaly jáne delegatsııa basshysyna arnalǵan jeke kabınet bar.
«Konrad Adenaýer» ushaǵy 2011 jyldan 2023 jylǵa deıin Germanııa úkimetiniń qyzmetinde bolǵan. Osy kezeńde ol eldiń kantslerlerin, prezıdentterin, Býndestag basshylaryn jáne syrtqy saıası vedomstvo jetekshilerin tasymaldaǵan.
Ushaq qyzmet etken ýaqyttyń edáýir bóligi Angela Merkeldiń kantslerligi kezeńine sáıkes kelgendikten, oǵan beıresmı túrde «Merkel borty» degen ataý berilgen.
2022 jylǵy qarashada Germanııa Qarýly kúshteri jańa Airbus A350-900XWB úkimettik ushaǵyn paıdalanýǵa berdi. Oǵan da Germanııa Federatıvtik Respýblıkasynyń tuńǵysh kantsleri Konrad Adenaýerdiń esimi berilgen.
Al jýyrda Germanııanyń qazirgi kantsleri Frıdrıh Mertstiń ushaq basqarý quqyǵynan aıyrylǵany belgili boldy.