Germanııada amerıkalyq F-16 joıǵysh ushaǵy apatqa ushyrady
ASTANA. KAZINFORM – Amerıkalyq F-16 Fighting Falcon joıǵysh ushaǵy seısenbi kúni Germanııanyń batysyndaǵy Shpangdalem AQSh áskerı áýe bazasynyń mańynda apatqa ushyrady, dep habarlaıdy Kazinform-nyń menshikti tilshisi.
AQSh Áskerı-áýe kúshteriniń 52-shi joıǵysh bólimshesiniń qolbasshylyǵy málim etkendeı, oqıǵa jergilikti ýaqyt boıynsha saǵat 14:30 shamasynda Germanııanyń Reınland-Pfalts jerindegi amerıkalyq áskerı áýe bazasyna jaqyn aýmaqta bolǵan.
Ushqysh ushaqtan katapýlta arqyly shyǵyp úlgerip, medıtsınalyq kómek alyp jatyr. Onyń jaraqatynyń aýyrlyq deńgeıi resmı túrde naqtylanbady. Apattyń sebepteri anyqtalyp jatyr.
Oqıǵa ornyna áýe bazasynyń apattyq-qutqarý qyzmetteri men Bıtbýrg-Prıým aýdanynyń azamattyq qorǵaý kúshteri jumyldyryldy.
Germanııanyń áýe qozǵalysyn basqarý qyzmetiniń málimetinshe, ushaq oqý-jattyǵý ushýynan keıin qaıtyp kele jatqan. Jattyǵýǵa birneshe ushaq qatysqan. Oqıǵadan keıin qalǵan ushaqtar Ramshtaın qosalqy áýeaılaǵyna baǵyttaldy.
Kórshiles Bınsfeld eldi mekeniniń turǵyndary áýege kóterilgen tútin baǵanyn baıqaǵan. Jerdegi adamdardyń zardap shekkeni nemese turǵyn úılerdiń qıraǵany týraly aqparat túsken joq.
Shpangdalem áskerı áýe bazasy Germanııadaǵy AQSh Áskerı-áýe kúshteriniń F-16 joıǵysh ushaqtary ornalasqan negizgi baza sanalady. Munda AQSh pen NATO múddesine qyzmet etetin eskadrılıa ornalasqan.
Buǵan deıin Túrkistan áýejaıynda ushaqtan aqaý shyqqany týraly jazdyq.
